Blog do Talianeto

sábado, 3 de outubro de 2009

Omenaio a Frei Rovilio

Rovilio in Paradizo!

A Piero Parenti ghe tochea insegnar el talian ai tozatèi del Paradizo. Ma lu nol vea la condota necessària. Vanti ghe piazea insegnarghe a far dispèti, come, cavarghe pene dele ale ai Àngeli, o sinò méterghe urtighe sotocoa a le bèstie.
Gesù ghe dize a S. Piero:
- Racomanda al Ângelo Sarafin che el vae tor Rovilio. Solche lu l’é bon par meter órdine in questo mestier.
- La vostra domanda l’é una òrdine par mi!
E presto, presto el ga scominsià a ciapar le providense:
Ciama Ilia Grigolo e ghe dize:
- Signore Ilia, ti coi to fradèi Bèpi, Gioani e Luigi e anca i capanga Màssimo Comerlato, Marcelo Tafarel e Giusepe Luza, sarà che sei boni da farme una caza in te una setimana?
- Calculo che si! Ghe risponde Ilia.
- Alora, ciapa quel che bisogna e pie in tola! Perché Sabo rivarà el Nuovo Maestro dea STC (Scola de Talian del Celo)!
Dopo quelo, el ciama la Giulia Moretti Grigolo e el ghe dize:
- Signora Giulia, Sabo darò una Festa qua in Paradizo e bisogno che te fae una bela polenta, con formaio, salame e radici. Ciapa le tue sorele, Madalena, Paula e Hermìnia e le tue comare, Bepina, Oliva, Irma e Sissi e parécia tuto el magnar. E par i tosatèi, una Menestra de Agnolini.
Dopo, el ciama Énio Pozanske e Vitório Gemeli, pena rivà in Paradizo e el ghe racomanda masnar tuta la farina necessária e portàrghela ale done.
Dopo, ancora, el ciama Santo Zago e so fioi Américo e Massimino e el ghe da l’òrdine par pestar do ua e far vin a bastansa.
Finalmente, el ciama Giovani Paolo II, el Véscovo D. Càndido Maria Bampi, Mons. Benvegnù e i Preti e fradéi Olivo e Sèrgio Binotto e el Pe. Scopel e el ghe racomanda pareciar una Messa Campal e Solene par el Novo Maestro.
Par fin, nel Vendre, ciama el Àngelo Sarafin:
- Sarafin!
- Ale vostre òrdine, S. Piero!
- Ciapa una saeta con indòrmia e vai a Porto Alegre tor Rovilio. Bisogna che el rive qua doman, vanti del mezodi.
Cosi el ga fato. Ga ciapá suo caretin de nùvole, ghe a metesto rento tuti i bisogni, tanto par ndar via come par ritornar col suo “fagoto”.
Ze rivà a Porto Alegre gera romai scuro e el se a indrissà par banda dea strada Veríssimo Rosa, 311 e el se a postà drio la porta dea càmera de Rovilio. De matina, bonoreta, vanti desmissiarse, Rovilio ga sentio una spunciadeta tel suo cuore e súbito el ga visto Sarafin. El ghe dize:
- Chi sèi e cosa voleo?
- Molto piazer, Sarafin ale tue òrdine! Son incargà de menarte al Paradizo.
- Ma cosi presto? Non da par spetar due o tre di, almanco? Bisogno finir ...
- Òrdine son òrdine! E io non discuto òrdine, io obedisso! No gera ti che te preghea ai to fedeli par èsser sempre pronti? Méti su queste còtole bianche e queste sinele d’oro e rento del caretin che l’é postà darente la finestra.
Rovilio, medo spaurà, el ga fato tuto come el Àngelo ghe a dita. El ga pensà: “Bisogno spissigarme, perché no sò mia se l’é vero o se son drio sognar!” Ma, a cada spissigon nol sentia gnente. Alora, el ga dita sotovoce: “Me vedo ancora butà in leto! Non capisso gnente! Magari, sia come Dio vol!”
- Che cosa sucede? Ghe domanda Sarafin.
- Gnente, gnente! Son drio parlar coi me botoni! Ghe risponde Rovilio.
In pochi secondi i due i gera rento del caretin de nùvole e a posto par el viàio de ritorno. Sarafin parea un Piloto de Fòrmula 1. Robe che el rabalte Rovilio:
- Pian col Andor che te me sassina! Ghe dize Rovilio, tegnendose con le due man par no cascar fora.
- Chià! Chià! Chià! Sta calmo, Rovilio! Noantri due siamo soto la Protesion Divina!
- Mi sò! Mi sò! Ma non bisogna coionar col perìcolo!
- Calma! Calma! In pochi menuti rivaremo!
A le nove in punto i vea rivà. Sarafin el ga sonà la buzina, come segnal combinà con S. Piero. Imediatamente, la Granda Porta se verde e el Campanil co le sue diverse campane de tute le grandeze e soni un pi bel che quel’altro, i ga scominsià a sonar, foghetoni a s-ciocar, una infinità de Àngeli zolandoghe intorno, etc. Un spetàcolo che Rovilio mai più gavea visto. E la so legria la se a completà, quando el ga visto postà ben darente de quela Portona Selestial i so Genitori, Amilcare e Maria Moretti. In tre salti el gera insieme a lori. Ghe a dato un strucón a cadauno, de quei spaca ossi, che se scoltea come on crepar de costele. E li abrassea, li basea, fin che ghe a rivà S. Piero e el ghe dize:
- Frate Rovilio, benvenuto al Paradizo! Siamo con problemi con la nostra Scola de Talian. Piero Parenti, vense de insegnarghe ai tosatèi come se parla el talian, li insegna a far solche malegràssie. In Terra, come Nanetto, el podea far quel che el volea, ma qua in Paradizo scambia la fegura, capìssitu?
- Si! Si! S. Piero! Ghe risponde Rovilio.
- Il pròpio Gesù in persona el me ga dita par ciamarte. Basta che te fae come te a fato in Porto Alegre con la EST. Infine, méter òrdine in tea Scola de Talian, la Língua Ufisial del Paradizo! D’acordo?
- Farò de la mèio maniera possìbile!
- Luni te prezentarò al tuo novo posto de lavoro, però, oncoi l’é di de festa in tuo omàgio. Sèvita a ciacolar coi to genitori e altri amici che i ze rivà in celo prima di te!
- Gràssie e tante gràssie, S. Piero! Volea solche domandarve se sarà possìbile conosser la Santìssima Trinità e anca la Maria Vèrgine?
- Tuti lori i vegnarà ricéverlo da qua on poc. Adesso vègni magnar, senò te creparà de fame! Te si bianco come una candela!
- Gràssie e tante gràssie, nantra volta, S. Piero! Le me budele ze drio brontolar, l’é vero!
Rovilio nol se tegnea de tanta felicità! El Paradizo gera milioni de volte mèio che i dizea i libri in Terra. In medo tanta gente nol vea qualche dificoltà par incontrar i so amici, come Piero Parenti, Mons Benvegnù e anca D. Càndido Maria Bampi, el Véscovo che lo ga ordenà prete. Anca el se a incontrà con Teixeirinha, col Violon e la Mary Terezinha, co la so gaita. Dopo cantarghe la mùzica “Querénsia Amata”, i lo ga mena al STGP (Sentro de le Tradission Gaùsse del Paradizo). Ma una roba ghe a ciamà l’atension. Nol vedea gnancuno político, de quei che ghe dea sberlete in tea schena, sempre che vea qualche evento, tanto come prete, quanto come omo leterato, persona de molta influensa política e sosial, che el gera. El ghe a domandà a S. Piero, che ghe a deto::
- Varda, Rovilio, i polìtichi par vègner rento quà, l’é semplice: basta che i se scuze con tute le persone che, in vita, i ghe a fato qualche mal. La “paga” corisponde a setanta volte sete, per cadauna malagràssia fata. Come i ze massa orgoliozi e i ga el nazo voltà insù, alora l’é difìcile che i se quadre. Per questo que quei mostrici i ze molto rari, per qua.
A le dieze in punto scomìnsia la Messa conselebrata, Rovilio come Presidente; a la so banda drita Gioani Paolo II, Mons. Benvegnù e Prete Olivo Binotto; a la banda sanca, D. Càndido Maria Bampi e i Prèti Sèrgio Binotto e Humberto Scopel. A tre metri de altessa, drio l’altar, Dio Padre, al sentro, Dio Figlio in tea banda drita e Dio Spìrito Santo ala banda sanca, tuti i tre sentai in careghe d’oro. Maria Vèrgine, anca, solche on poco pi abasso dea Santíssima Trinità. Rovilio el preghea con molta sapiensa. In tea prèdica el ga fato una pregassión sora la so vita in Terra. El ga ringrassià a Gesù, personamente, per la assistensa che ghe a dato nei sui setanta quatro ani de vita, pieni de tanti momenti de legria e felicità. E Gesù ghe a fato de moto che gera mérito suo e no bisognea ringrassiarlo. Intanto che el parlea sora el Ritorno di Nanetto Pipetta, el ga profità par domandar a Gesù, una benedissión spessial a tuti quei che a scrito sora Nanetto, quei che scrivea e anca par quei che scriverà sora Nanetto. Gesù ghe a dita che no bisognea preocuparse, perché a tuti i òmeni de bona volontà avea la so garantia de vita eterna piena de gràssia e felicità, come vea sucedesto a lu. Rovilio lo a ringrassià de pùblico e in alta voce, in nome de tuti i scritori di Nanetto. Vanti finir so prèdica el ghe a contà una pìcola storieta:
- Gere drio pregar in Veranòpolis-RS e una veciota de sessanta e pochi ani, la vien in sacrestia, dopo messa, domandarme se la podaria copar suo spozo, che nol vea ancora trenta, perché l’avea “scornà”, co na toza de 25. Ghe ò domandà tre di par darghe l’autorizasión o nò par èsser una sassina! In questo tempo go ciamà el tozo par saver la verità. Lu me a deto che la vècia la lo ga imbroià par maridarse. E lu nol pol gnanca saludar gente de so fameia che la vècia la vol impirarlo su na steca o sinò darghe on tiro de s-ciopa in mezo la testa. Me ga dita, anca, che la so vita l’é un inferno.
Tre di dopo, riva la veciota:
- Che fàcio io, Frate Rovilio?
- Signora Marcelina, suo Shiquinho nol mèrita èsser mòrto cosi presto! Daghe un toc de bolo e màndelo scartossar panòcie! Vense de coparlo e pérderlo par sempre, podé guadagnar un “camarada” per sempre!
- Sètu che te ghè rezon!
L’é sta così, che lo ò salvà dei corni de quel “Bragado Rabiozo”!
- Saluti e arivederci!
Dopo messa tuti i se a tacà a magnar, a bever e a ciacolar. Quando i ga finio, el sol gera drio sconderse. Alora, S. Piero a menà Rovilio a la so “Stata Eterna”. Gera una cazeta pìcola ma ben fata e bela. Una scàndola sora la porta la dizea: “Santo Rovilio” – Prete.
- Ma come! Ghe dize Rovilio. Presto così?
Ghe risponde S.Piero.
- Qua l’é così: Par vegner rento in tel Paradizo bisogna èsser neto de pecati. In soma: Santo! Qua no bisogna far prossesso di beatificassion e dopo di canonizassion, come se fa in tea Terra. La bisogna! Qua, nò! Capìssitu?
- Si! Si! Solche ò stranià on poc la prèssia. Solamente questo.
- Va ben! Alora l’é bon costumarte. El Celo l’é diverso dea Terra! Qua se lavora e se fa tuto sensa polìtica. Qua, siamo tuti compagni e la legria de uno, l’é segno per tuti èsser contenti. Luni parlaremo sora la Scola de Talian. Bona Note, Rovilio! Bon ripozo!
- Bona Note, S. Piero! E gràssie par tuto!
Così ze sta la riva de Rovilio al Paradizo!

Eduardo Grígolo – Nanetto in Strada
egrigolo@uol.com.br
CI/RG: 5.634.606-2 – SSP/SP.
Tel.: 011-9428-0981
Jundiaí/SP.

PODEMO CAMBIAR

Honório Tonial

Podemo cambiar,
Basta scominsiar
La ASVIRMONTAVE
Sarà la prima nave
Poareto come un bambin
Che vien al mondo sensa roba...
Pensémoghe sora un s-ciantin
Na cosa vecia la pol deventar nova.
Podemo cambiarla
Basta scominsiar
Spesso doperarla
Avanti a rincurar..!
- La zé drio sparirse..!
Parlarla, romai, no se sente pi.
Se no ndemo mia reunirse
La morirà in pochi di...
Podemo cambiarla
Basta scominsar…
Podemo resgatarla
Basta voler salvar.
El parlar dei nostri antenati
Ntel Brasil se ghe ciama Talian
El gavarà i so trodi refati
Incoi par noantri e par i altri, diman
Podemo cambiarla
Basta scominsiar.
Na parola o na frase al di
Dea mama, dea nona o del zio
Dal poco a poco e sempre depì…
Ndemo avanti. Mai tornar in drio
Dea informática ciapemo la strada
Par darghe vita ai sentimenti
Dei nostri noni semo dessendenti
La so memória la sarà registrada.
Podemo cambiar
Basta scominsiar.
E cosa insegnar,
Cosa imparar,
Cosa studiar?
La pietà dea corona,
La obediensa ai genitori,
Le bele stòrie dea nona
El sudor e le làgrime dei laoradori
I primi posti fondai
I ani che no i retorna mai…
Podemocambiar
Basta sominsiar.

Registro de Luis Agostnho Radaelli

Obrigatório:

1 - Nome: Luiz Agostinho Radaelli.

2 - Cità: Lajeado, Província del Rio Grande do Sul.

3 - Paese: Brasil.

4 – Profission: Maestro (professor).

Facoltativo :

5 - Data de nàssita: 20/12/1954

6 – Religion: Católica

7 - Scolarità: Secondo Grado

8 – Particularità: Son nassesto tel paese de Nova Bréscia che’l sta tea valata del fiume Taquari. Go fato programa de radio doperando el Talian par depi de 15 ani. Adesso me son fermà par colpa den mal tea gola ma no desmentego mia la me lèngua materna. Un vero strucon a tuti quanti se infrugna a no dassar morir questo bel parlar.

9 - E-mail par contato: luiz@radaelli.com.br

.....................................................................................................................
Ve ringrassiemo con antessipassion.

Erechim, Brasil, febraro de 2009.

Honório Tonial

Registro de Luis Radaelli

terça-feira, 29 de setembro de 2009

Caìssimo Diego

Carìssimo Diego
Go ricevesto el tuo E-mail e, seanca son vecio, con 83 ani compidi el di 26 del mese de marso me ga vignisto la adrenalina dea me zuventù…
Un zóveno de 23 ani, chel vol iutar salvar el idiomna dei nostri antenati..! Brao,Diego.
Te si un esempio e na speransa.
Va al Google e digita : Blog do Talianeto.
Te vedarè chel tuo E-mail el sarà cognossesto par persone del Brasil, Argentina, Canadá, Stati Uniti, Germania e Italia.
La nostra ASVIRMONTAVE – Assossiassion Virtual Mondial del Talian Veneto la vol ver el onor dea tua participassión..
Se te me mandi el indirisso postal tuo te riceverè un libreto mio chel poderà iutarte a imparar el T alian Véneto
Varia caro che te me mandéssi el E-mail del. Professor tuo amigo. Mi go el suo indirisso ma el ze sbalià. El computer nol lo aceta mia…
Par incoi, te saludo, te ringràssio e vui desiderarghe salute a tuti quei che ti te ghe voi ben..
Honório Tonial

segunda-feira, 28 de setembro de 2009

Elemento del Talian

ELEMENTI STÒRICHI PAR EL PROJETO DEL TALIAN VÉNETO.
Honório Tonial

a) INTRODUSSION :
Ntea seconda metà del sècolo XX gavemo scominsià un movimento literàrio con la finalità de construire na Nova Lìngua che, dopo de tante proposission, discussion, stùdio e argomenti la ga ricevesto la denominassion de :TALIAN .
Sto novo idioma l'è parlà in diversi munissìpii del Rio Grande do Sul, Santa Catarina, Paranà, San Paulo, Spìrito Santo e par tute le parte del mondo onde podemo catar descendenti dei imigranti vignisti dal norte dea Itália, oriundi, spessialmente del Véneto, Lombardia, Friulli-Venezia -Giulia e Trentino Alto Adige e che i abita anca tel Brasil.
Sbandonai in meso al bosco, squasi tuti analfabeti, parlando ogniuno el so dialeto specìfico i ga scominsià a comunicarse ntra de lori e la prevalensa dele parole , una sora laltra, la ga resultà tea nàssita de un novo parlar chel ga incorporà anca i novi vocàboli destinai a nominar le cose che no i gavea cognossesto ai so posti de orìgine.
Ma, par rincurar, registrar, tutelar e difonder la nova lìngua semo ndati intesi de sculpir i trè fondamenti che, secondo credemo, i se torna indispensàbile par la esistensa de una vera forma de comunicassion e che i è :
I - Abecedàrio o Cartilia : Indispensàbile par el registro dea Fonética e formassion de elementi compositivi.
II- Gramàtica : Necessària par stabilir e orientar la sintasse.
III- Dicionàrio : Un strumento de règola dea grafia e dea significassion dei vocàboli
Reunidi, par la prima volta, a Serafina Correa-Rs.: Paulo Massolini, Roberto Arroque, Rovilio Costa, Darcy Loss Luzzatto, Honório Tonial, Renato Nichetti, Alzir Beltran e Julio Posenatto gavemo scominsià a redìgere le Norme par la Unificassion dea grafia del Talian.
Diversi altri incontri a Caxias do Sul, Bento Gonçalves, Porto Alegre e Erechim i se ga transformà nte na vera Crosada che no la gavarà stancamento o ritorno.
- Come scominsiar..?
Nanetto Pipetta l'è stato el primio registro scrito del Talian.
Dicionário de Alberto Stavinski el se presenta come el pi importante registro ntea strada vencitora del novo idioma.
Darcy Loss Luzzatto el apresenta la so Gramática.
Honório Tonial el riceve el incàrico de redìgere la Cartìlia e salta fora ADESSO IMPAREMO.
Rovilio Costa el verde la so richìssima EST e el ne mete davanti el nostro naso na sentenaia de scritori del Talian.
Helena Cofortin, dea URI de Erechim la divulga la so Tese de Dotoressa rissercando e registrando verso el Talian.
Claudino Pilotto, poeta rispetà, el divulga RITORNO A LE RADIZE.
El DISSIONÀRIO PORTUGUÉS TALIAN, de Honório Tonial el riva ntea hora giusta.
Luzzatto el registra el so bel DICCIONARIO TALIAN – PORTOGHESE.
El movimento del Talian el scomìnsia a far programassion semanale tea ràdio-difusion de tanti munissìpii.
El Correio Rio Grandense el mantien viva la colona : Vita, Stòrie e Frotole, de Rovilio Costa e Arlindo Batistel, con la colaborassion de diversi scritori del Talian.
Luzzatto el insegna el Talian a Bento Gonçalves.
Tonial el verde la scola del Talian a Erechim, Gaurama, Jacutinga, Ibirubá e Palma Sola SC.
A Erechim-RS, Tonial el fonda la ASSAPRORATABRAS, Assossiassion dei Apresentadori de Programassion de Rádio in Talian del Brasil che la se reune anualmente , in posti diferenti, tel ùltimo sabo de novembre.
El Correio Rio Grandense el publica el Corso de Talian, col timon in man de Rovilio Costa.
Pedro Parenti el revive la Stòria de Nanetto Pipetta e, par desgràssia del nostro Talian, el vola al altro mondo in meso al laoro.
Nantro che va parlar Talian in Paradiso l'è Azir Beltran chel sarà drio apresentar la " Fabricheta de Rìder" ai Àngeli e i Santi.
E Giovanni Meo Zilio? Lo credo nte un bel posto in Paradiso.
Angelo Dal Moro Sergio Angelo Grando e dversi altri scritori i ghe dà continuassion al eclètico Nanetto Pipetta.
Claudino Pilotto el mostra “ Ritorno a le Radize”, poetando.
Ary Vidal el publica “I Nostri Antenati”
Nantro che fà bele manifestassion Taliane el gera Claudio Dalla Coleta, nassesto a Alfredo Chaves (incoi Veranópolis) de star a Porto Alegre. E adesso el sarà dentista dei àngeli e santi.
Argel Rigo, de Fagundes Varela e Luiz Agostinho Radaelli, de Lageado i marca presensa diverse volte.
Alcides Canton e Valério Zanin i onora el Talian con belìssime apresentassion ntea Teve Catarinense e tea SBT..!
Tele Università de Erechim, Santa Maria e Caxias do Sul, par la prima volta tel mondo vien fora um Curso Intensivo de Talian, -pago in “euros”, gràssia a la inissiativa e prestìgio del On. professor GIOVANNI MEO ZILIO.
E se fusse far na risserca profonda podaréssimo registrar depì de na sentenaia de scritori e scritore del nostro Talian che vui dimandarghe scusa suito par no poder nominarli.
Scoltando, “ A Voz do Brasil” na programassion ofissial del Governo, el Ministro dea Cultura Francisco Welford el gà mensionà um Decreto del governo brasilian stabilindo el programa : “ REGISTRO DOS BENS CULTURAIS DE NATUREZ IMATERIAL”, ntel IPHAN – Instituto do Patrimônio Histórico e Artístico Nacional e el fà referensa al ‘” Falar dos imigrantes italianos no sul do Brasil”
Honório Tonial , in nome dea ASSAPRORATABRAS – Associação dos Apresentadores de Programas de Rádio Talian do Brasil el rimete al Ministero dea Cultura un recrimento destinà al IPHAN – “Instituto do Patrimônio Histórico e Artístico Nacional con la finalità del Registro del TALIAN ntel ano 2001.
El processo el tramita in fase quase final.
La zé stata la prima làngua “straniera?” a voler tornarse viva come BEM CULATURAL IMATERIAL.
Col advento dea informática la comunicasson la deventa facílima.
El Orkut, I Blog, la Wikipedia e el coreio eletrônico i ga na riquessa de informassion didàtiche e generalità registrade in língua Talian.
La inissiativa dei due Roberto Giovanni Zaniolo – un dea Germanai e quelatro dea Itália, nsieme com Euardo Montagner , del México e con la adesion de persone del Canadá, Argentina, Itália, Brasil e fin del Congo somìnsia um movimento de risgato e registro del TALIAN VENETO internassionalmente.
La ASVIRMONTAVE – Assossiassion Virtual Mondial del Talian Veneto idealisada par Honório Tonal, col suo regolmento la riceve la acetrassion de tuti i simpatisanti dea nova-vecia lìngua
Par cognosser na parte importante de sta nova-vecia língua basta assessar Usuário Discussão Talianeto o Blog do Talianeto.
Ghe femo referensa a queste inissiative con el propósito de unificar, quanto posìbile, la maniera de parlar e de scriver el Talian Veneto tuti compagni, rispetando idiomatismi e altre particolarità specìfiche de ogni participante.

terça-feira, 22 de setembro de 2009

REGULAMENTO

REGULAMENTASSION DEL PROSPETO DEA ASVIRMONTAVE.

AI ORDENADORI DEA ASVIRMONTAVE.
Parque la nostra entità la zé virual, el nome dei so representanti i ciamaremo ORDENADOR(a) , vol dir : Voluntàrio(a) de unificassion Del Talian Véneto.
- COSA PODEMO FAR?

A) Vèrder comunele de due o depì persone che acete uitar a salvar el Talian Véneto.
B) La maniera de sominsiar: Vìsita a la fameia, o un contato par meso del E-mail o na telefonada, un aviso par la ràdio, etc....
C) Trucar informassion scrite in Talian Véneto
D) Comunicar a la ASVIMONTAVE :Indirisso : hotohonorio@yahoo.com.br
E – El munissìpio ndove el zé star. El E-mail del novo Ordenador(a).
F – Dar sugestion a la ASVIRMONTAVE
G – Fondar le comunele in tuti i munissìpio ndove se parla Talian- Véneto

I mèio maestri, professori e insegnanti i zé el pupà e la mama. Tante olte anca i fradei e altre persone.
Se fusse insegnar solamente na parola o na frase al di, in poco tempo el nostro idioma el saria salvo. ( Dechiarassion de Rovilio Cosra, )
H – Al mese de desembre faremo um relatório chel sara publicà ntel Blog dea ASVIRMONTAVE e ntel Blog do Talianeto mostrando el belíssimo laoro che ogniuno dei Ordenadori i gavarà fato, seguramente.
Gavemo belche na sentenàia de ordenadori in diverse parte del Brasil, spèssie ntel Grando do Sul, Santa Catarian, Paraná e Mato Grosso do Sul.
In diversi paesi Del mondo ghe zer persone ruincurando la lengua e la cultura dei nostri antenati.

Erechim primavera de setem bre de 2009
Honório Tonial
Ordenador global.