Cambiamenti
Co me desmissio scolto i osèi che i canta su i frutari e su le pèrgole del vignal, come par saludar la giornada che riva. Co vardo a torno vedo le piante che fiorisse fiori dei piu diversi colori. Perche ze dio scaldar, fin l’ária par che la sia mèio. Va via l’arieta freda del inverno e ariva insième coi colori dea primavera, i bèi di de sole che ne invita a la vita, a verder le finestre par che’l sole ndessa rento le case.
In tea colònia i scominsia a rabaltar la terra par somenar i grani e così preparare la nova stagione de racolta.
Compagno a tuto anca noantri semenemo i ani che’l Signor Dio nel dà. Co passa i ani binemo su bona parte de quelo che gavemo piantà. Arquanti i guadagna sòldi, altri salute, qualchedun arcoanti pedòci, ma tuti co i diventa vèci i guadagna na sbrancada de malegrassie, sia coi dolori de schena, de gambe, la tremarola o anca un bel par de ociai par compensare la dificoltà de veder i schèi. E mi che ve scrivo, par esser diferente, son resta gòbo, meso sordo e sensa denti. No ze mia na maraveia veder tuti questi cambiamenti? Par compensassion go sentisto i profumi dele primavere che oramai le ze ndate via.
Colaboratore: Luiz A. Radaelli – Lajeado
