LA DESIMPACADERA

LA DESIMPACADERA

Chel me la contada el zé stato el Eder Balen quando chel me ga porta el gás par el fogon.
Um tosato el ndea a morose a caval de na egueta impacadera.
Tante olte la se fermea ntea strada e no gue zera santi de farla ndar vanti.
El ze ndato dal veterinário e el ga dimandà cosa chel podaria far par tirarghe la barde de sta bèstia;
- Mi gavaria na pomada par méterla soto a côa e la va avanti suito.
Un bel sabo el monta a caval par ndar a morose dea Gelina, la fiola de negossiante.
Col riva darente un pontesel la égua la se impaca, El ga dato sicotade, el ga osà, el ga bestemâ e no ga giovà gnente...
_ - Incoi vui proar la pomada desimpacadera...!
El verde el tubeto, el ciapa na sbrancada de pomada, el ghe alsa la côa dea égua, el ghe sfrega la pomada...
La ga dato na curcuviada e la se ga invià come na saeta, via banda la casa dea morosa ndove la era costumada.
Ma, e adesso? Come far par ndar a veder la so inamorada?
El ga pensà:
- Case, quà darente no ghinè e el negossiante el stà distante.
E dopo de avelirse gue zé mignisto na bela idea ntea testa.
_ Se la pomada la ga fato efeto ntea egueta, la próo anca mi.
Nol ga gnanca ben finio de passàrsela ntele culate chel se ga ínvia pi sgelto chel vento, el ga passàvia la égua e el zé rivà casa dea Gelina mesa ora prima dea bèstia.
Magari, el gera tuto descaveià e el gavea na tremarola., che mai.

CURIOSTÀ

.
Honório Tonial

- Sarà che i è stai i nostri primi imigranti a portarle ntel Brasil, o le gavarà nassesto quà..?
Go idea che le due cose le ga valità.
Tornemo indrio ntel tempo, là par ani quaranta del sècolo passà e cataremo la festa del Carnaval in colônia, fata de na maniera stramba.
Solo i tosati e i omi no tanto veci i podea partissipar.
I se vestia de dona, due poronghi par le tetê, i se pintea el muso col calìdene del fogon e i ndea daí visini che no i era boni cognóserli.
Dopo de far tanti schersi e anca qualche cantada i se lavea par darse da ricognosser.
Un ciodo de tola, el spaurea i can rabiosi e un gran de sal grosso par curar le giàngole, se lo metea in scarsela.
Se gávea el costume de taiarse la barba solo al Vendre Santo e mai nte nantro vendre par parar via el mal de denti...
Ntea Stimana Santa se fea le ràcole parché no se podea sonar le campane al Vendre Santo.
Quando i ndea a morose o a la festa dea Sagra, i tosati i ghe lighéa la cóa ai cavai, par assarli pi bèi.
Ntele feste grande no se podea laorar. Alora, i mantimenti par le bèstie i era racolti el di prima.
Ntea ligna Garibaldi e anca al Maragata, Nova Prata a quel tempo el formento lera semenà e querto co la sapa, col vassor o co la gràpia.
Par taiarlo i doparea la”sésola” o “missora”, pi tardi el “segheto”parché no ghera mia la “colheitadeira”.
Quel che catea su la quantità pi granda de sachi de fomento el gávea el dover de pareciaghe na “grostolada” a tuti i soci dea capela.
Co i ndea a filò i se portea insieme un fasso de steche de scàndole par iluminar la strada al ritorno parche la luna la era belche ndata zó.
Go sentisto dir che ntea “China” i rospi i è scampadi trè dir prima che vignisse el teremoto.
Ghen sarà tante altre coriosità che bisognaria registrarle parché le fusse cognosseste e no le se sparissa.
Varia caro e restaria ringrassiante, ricever la descrission de altri costumi.
Par questo, vui assarve el me indirisso:
Rua Marechal Rondon, 458
CEP. 99.700.000 = Erechim – RS.
hotohonorio@yahoo.com.br