Tocheti de Vita

NANTRI TOCHETI DE VITA
Honório Tonial


Ai sédase de marso de duemilaesìnque, un bel dioba dopo mesodì, là par le due ore, Erechim el ga ricevesto la vìsita del Presidente del Brasil: Luis Inàcio Lula da Silva , insieme con un paro de ministri e altra gente dea so laia.
Ntea piassa, davanti a Prefeitura se ga mucià depì de trèmila persone, vigniste de diversi munissìpii, co la condussion paga, nose sà par chi..!
In meso a sto mar de gente se ga postà el Bianchi, de star a la linha San Luigi, quà a Erechim, ntea strada che mena ai Nazzari, ndove se pol catar la cascata co le àque termae e co le so bele stòrie.
Tuti i vendri, là par le nove dea matina, el Bianchi el vien portarme el late e mi ghe compro anca un chilo de erbamate par stimana , propio na bona erba, fata ntea so tafoneta, par far el me scimaron…
Quel di disassete de marso, l.è rivà, tuto prosieta e el me dise:
- Incoi mi son deventà nantro omo...! Magìnete che el geri go ricevesto, a casa mia, la vìsita del Presidente del Brasil, el metalúrgico Luis Inàcio Lula da Silva...! Pi che la lotaria, la sorte granda..!
- Ma, zelo pròpio da vero..? Ghe dimando meraveià.
- Si, si...El me ga dimandà se gavea bisogno de qualcossa...
Go risposto che no semo mia drio ndar ben, mentre gavemo sta bruta seca parche fà tre mesi che no piove mia pi, ma se cata gente che la è pi mal ciapada che noantri...
El me ga vardà, dimandà la man drita, el ga vardà i cali dea me man..El ga dato na bela ridada..
- “Ah Ah Ah... Vardé quà, un bel esémpio... Incora el vive la fraternità, la solidarietà..!”
Dopo el ga piantà la so man in scarsela , el ga tirà fora un paco de note de sento reai, el le ga butade par ària e el me dise:
- “Par intanto le te bastarà par indrissarte.. Se te ocore incora parla con mi.!”
- E ti, le ghetu catade su tute e le ghetu contade..? Ghe go dimandà.
- Go mia fato ora parché lu el ga volesto saludarme par ndar via. Mi lo go ringrasià e ghe go dito che lu l,è pròpio brao. Adesso no ocore gnanca pi laorar ...
= E mi te ringràssio par la to bela storieta, parhé un vero Talian nol assa mia i soldi in tera e el li conta tuti suito.! La go finida mi.