La Prima Carta

LA PRIMA CARTA
Honório Tonial

Ritornemo ai 7 de genaro de 1992.
Ntel giornal “ A Voz da Serra” de Erechim, Rio Grande do Sul, Brasil cataremo la prima carta in Talian Veneto scrita par honório Tonal destinada a la Prefeitura Municipal de quela sità:
“ PROEMO VOLTARLA
Gavemo scrito, sti tmpi, in tel giornal A VOZ DA SERRA, uma carta al mio cardiologista, in te la língua brasiliana e la ga sortio poca cosa.
Adesso me son inacorto che le nostre autorità munissipae le zé soasi tute de origine italiana: Zanella, Paludo, Fabris, Farina, Golin, Frizzo, Peccin, Nazzari, Fioravante, Gasperin, Tirello, Parenti, Morandim, Tonin, Tormen, e se ghinò smentegá coalcheduno ghe dimando scusa.
Alora, go idea che mi sia meso stupidoto e gapia scrito male.
Proemo voltarla e femo le nostre reclamassion in dialeto veneto, meso spacà sù, magari, ma mi cato che cosi i pol capirlo scoasi tuti.
Ghe zé el Parché Longines Malinowski, el nome go idea chel sia polaco.
Mi me piase ndar caminar intorno parché el zé um bel posto, sensa nissuni che strova.
Càspita, mi adesso volaria inconvidar anca tute le autorità a ndar a spasso anca lore intorno de sto Mato dea Comission un par de volte.
E no ocore mia vardar. Basta che i snaze..... E no ocore mia snazar tanto par sentir che bruta spussa che ghe zé.!
I dise che la natura no la sà mia parlar, ma la sà a far vendeta.
A l´àcoa marsa che la ghe stòmega, ela la ghe risponde com malatie....
Son scoasi seguro che se vien el Cólera, le autorità le fa presto finr co la spussa e i cata na maniera de snetar l´àcoa
. Come che se fa in tante altre parte dea sita.
Se i vol processarme e méterme in preson mi farò um gran sforso par fermar la sporcaria del Presídio che la score lìbera in meso lê piante.... – Sarali incora vivi i macacheti..?
Salute a tuti.
Honório Tonial “
Bisogna spiegar che i personaii mensionai i zé : El Prefeito (sìndico), el Vice-Prefeito, secretàrii e Vereadori dea sita de Erechim.
El giorno seguinte, diverse de queste autorità le ga invità la television locale e i ga scominsià a snetar el Parché Longines Malinowski e mi go discuerto la forsa del Talian Veneto., fa belche sédase ani.
Da quel di invanti no me son pi fermà e ogni momento dea me vita restarò a leder, scriver, pensar e viver el nostro Talian Veneto imparà da i me genitori e dea comunità ndove me son slevà.

Erechim, genaro de 2009.
Honório Tonial