RUDA EL LEON

Ruda el leon,
el leon che xe drento de mi ,
ruda pae robe bee ,
ruda quando che a xente ,
combina capee .

Ruda pai tusiti cei ,
sassinai da pedofili porsei .
Ruda ,quando chel vede
xente sciopa’
da on camicaze indrotrina’,

Ruda el leon, drento de mi ,
quando che vede zente maea’
drio sofrire sensa speransa ,
sofrire , par dopo morire….

Ruda el leon , drento de mi
Quando che nasse o dì
co a voja de fare ,
de vivare , de dare .....
o quando che xe sera
e del tempo ndato
te se queo che te ghe fato .

Ruda el leon
so on cèo che ride ,
sa na farfàea so on fiore ,
so du morosi imbrasài ,
in meso aea zente che core .

Ruda co te discori ,
co a zente che sa…..
na pagina pi del maestro ,
o co te ciapi da insemenio
par ver dito o fato
chelcossa de giusto
che no xe sta capìo .

Dee olte ,invese de rudare
el leon ,drento de mi ,
e sbaca ……
quando che stufo de tuto ,
del dire e del fare ,
me vien a voja de moeare.









Me vien voja de assare
che el mondo gira ,
al so modo ,aea so maniera ,
de assare che
se disa e che se fassa
e vivare in meso aea zente
no interesandome de gnente

Ma basta poco ,
par rinfrancarme ,
a paroea de n’amigo ,
na paca soea spaea ,
e.... torna a rudare ,
el leon drento de mi,
a rudare coa voja de continuare .

Sta vita che passa
sensa truco , sensa ingano ,
dì par dì , a te paga
del giusto e del faeà ,
e in tee spae ,
a te carga el peso
de queo che te te ghe merità .

Ruda el leon , e fin che el ruda
ghe xe forsa , ghe xe vita
ghe xe strade verte
e posti ndove ndare ,
e robe da dire , e robe da fare .

Ruda el leon , el ruda par mi,
ma anca par ti che te lesi ,
par ti che te pensi ,
par ti che te credi ,
par ti che te capisi .
par ti che te vui,
par ti che te se ,
par ti che te scolti ,
par ti che te vardi ,
par ti che ……………..

Ruda el leon , anca par
Roberto Zanioeo
E par Danilo Mason

Roberto Zaniolo
da Villa del Conte