POESIA

Poesia de Leda Ceresara Rossi – Obra: Fruti Salbechi

“Parlare véneto”

No sta mia vergognarte
parlare el to dialeto,
l’è el modo pi perfeto
pa’dir da indoe te vien.
L’è udor de la to tera
sugo de’ e to raise,
el to parlar me dise
che vèneto te sì.

El dire tuo l’è mùsica,
l’è un canto che consola,
fruto de chela scola
che i veci te ga dà,
parlato in casa e fora
parlato ciaro e s-ceto,
l’è belo el to dialeto
par chi lo sa scoltar.

No assar che se desperda
le stòrie e le canson,
proverbi e tradission
avù in eredità.
Fina da pena nato
co’a prima nina-nana
sul core de to mama
ti te lo ghè imparà.

Sto gergo te ricorda
el caldo fogolare,
parole dolse e care
tel core rancurà.
Te poi saver le lìngue
de tuto el mondo intiero
ma el to parlar pi vero
dialeto restarà.