Nadal Roberto G. Zaniolo dea Italia

Go visto……

Go visto zente , alsare i oci al cièo e pregare ,
go visto tanto dimandare……
Go visto depì , dopo ver bio , desmentegare….
Go visto capitei drio e strade ,
Madone che protege case e contrade .
Go visto …….poco o fursi gnente,
parchè vardando alto ,
no me so nincorto dea zente.
Anca Eo , poareto ,
se ga sentìo rifiutà col gera ceo ,
ma da grando el ga scrito in tel vangeo ;
mi no no so ,sconto chissà dove ,
so inframedo de voaltri ,
morendo in crose ve go da e prove.
Mi so chel poareto , che xe in te on cantòn ,
no queo che fa el furbon .
Mi so chel maeà ,che spera in tel dimàn ,
ma no go nissuni par parlare
par dirghe dei me crusi , del me magon .
Mi so in medo a drogai , e desperai ,
a morti de fame , a cei sbandonai a morti stciopài .
Mi so in tee lagrime de pora zente ,sugàe dal tempo ,
lagrime che no ga servìo a gnente .
So in tee case de paltàn o soe barache de lamiera ,
in doe che vive zente in tempo de lussi e sprechi .
Mi so la , che ve speto ,
no in te a cesa , fra a spusa
dell’incenso e dee candèe,
fra tante prediche fate de paròe
che se perde sensa rivàre
indoe che Mi so drio spetare.
No so sconto in tei altari , cui marmi coeorài ,
ma so inframedo de voatri ,
fra quèi pi sbandonai .
Invese de stare col coeo storto ,
vardar alto par pregàre………
vardeve torno , mi ve go insegnà
cosa che ghe xe da fare.
Garìa caro che savissi , da chi gnen tuto sto dire ,
e se no o savì , ve o fasso capire .
Mi so Gesù pa i cristiani , Allhà pai mussulmani ,
Budda , Confucio ol Dio che vuì ,
ma se fe del ben no ghe xe coeòre
né de bandiera né de pèe
tanto manco de cese o de moschee .
Xe na vita , che gira ste paròe ,
ma go visto ….. go visto oncora ,
zente alsare i oci al ceo par pregare ,
Go visto tanto dimandare……
Go visto depì , dopo ver bio…: desmentegare.


Roberto Zaniolo Da Villa del Conte
Novembre 2009