El Talian dentro de mi

EL TALIAN DENTRO DE MI.
Honório Tonial
El se ga slevà in brasso dea me mama Adelaide che la me dea da ciuciar e la me fea le dolse caresse che me piasea tanto..!
Son cressesto insieme dei me fradei, tuti mas-ci, parché la ùnica sorela la era una dei pi zóveni dei 14 fioi .
Go imparà a parlar el dialeto dea nostra comunità e el parlar dea nostra casa.
Me toca spiegar chel me pupà l´era fiol del furlan Antonio Tonial, nassesto a Caneva, Sacille, Friulli-Venezia-Giulia, e dea vicentina Elisabeta Moro.
Me mama Adelaide Dagani, la era cremonesa par parte del so pupà Francesco Dagani e mantoana dea banda dea nona Ernesta Bachi.
E a la Linha Boa Vista no ghinera altre stirpe. Solo Taliani.
Perondi, Fracasso, Giusti, Picinin, Dallaio, Amadei, Zénere, Tartari, Brunetto Bachi, e Tonial .
Tante olte vignia fora diverse confusion par capirse parché i dialeti i gavea diferense grande.
Me recordo che na matina la Alvira Tartari la è vignista a casa nostra e la me dise:
- El pupà el me ga mandà quà par veder se me impresté el tamiso...
- Cosa elo sto tamiso..? Go dimandà mi.
- Quel de tamisar la farina.
- Noantri no ghenavemo mia tamiso. Solo se te volessi el crivel.
- Proa mostràrmelo.
- Pròpio questo...! La me dise.
Ma, el Talian dentro de mi l ´è anca quel che ndea portarghe da magnar e da bever ai cavai, sconti tel mato, al tempo dea revolusssion del 1932.
E quel chel ndea ciapar i colombi, le galinete e i uru soto le tràpole darente a sorgente in meso el mato.
O quel che cavea su i viadoni par portargheli tel staloto o tel potrero par i porsèi.
O chel seghea la spagna par le mule, cosinea le suche par far el bevaron, cavea le patate dolse par cosinarle tel forno de matoni.
Chel ndea al fioreto via a la cesa e el preghea e el cantea in Talian le Lode Sacre e in Latin el "Pater Noster....., Ave Maria
Gràssia plena........ e l´Itànie.( Santa Mater Dei)...."
O chel ndea al molin con sèi quarte de formento o milio e el ritornea co la farina e le sémole.
Podaréssimo scriver un paro de libri a sto rispeto.
Ma vui parlar dei me primi tempi.
Ai quatro ani, mi savea tuta la dotrina che bisognea imparar par poder far la Prima Comunion :”Siete voi Cristiano..? I Comandamenti dea Lege de Dio, i Sacramenti, i Ati de Fede, Sperança, Carità e “Contrizzione” , le Orassion dea Matina e Sera e tante altre invocassion..
Incora incoi gò le me devossion. Quando vui catar qualche cosa persa fago na promessa a le ànime del purgatòrio depì sbandonae e vien la solussion
Anca me racomando al Àngelo Custode tuti i di.
Pi tardi, ai sei ani, son ndato a scola dal professor Mathias Tonial, el me pupà.
El primo di che son ndato rento tea scola, go dato el libro: Cartilia Maternal de João de Deus al maestro e ghe go dito:
- Podì dimandarme quel che volì, che mi sò tuto a mente..!
E gò scominsià: “ a,e,i,o,u ......ai,ui,eu,ia.......v = va, vai, via, uva, viúva.....f = fe, fui, fia, fiava, fava.....e la ùltima lission: Hino de Amor
Andava um dia
Em pequenino
Nos arredores
De Nazaré
Em companhia
De São José
O bom menino
O bom Jesus
Eis senão, quando
Vê num silvado
Andar piando,
Arrepiado ,
Um rouxinol
Que uma serpente,
De olhar fremente..........”
E ghe go dito che mi savea anca el secondo libro chel scominsiea con : “Guiomar e Julia, duas meninas irmãs”, tea prima lission; “José era um bom menino....Fazer mal aos animais é indício de mau caráter”, tea seconda lission.
Magari, me toca dir che mi savea tuto a mente ma no capia mia cosa che volea dir... Pròpio come um papagal...!
Ma vui dir che el ritrato pi bel e pi grando del vero Talian el sarà Naneto Pipeta, de Achiles Bernardi...
E se vardemo ben, cataremo tanti altri Naneti Pipeta anca el di deincoi.