Novi AmiciVenetimondo

Roberto Zaniolo dáea Germania



PS: L´amigomondoveneto OSNI GRAZZIOTIN me ga fato riflétare so ´na roba tanto bea e importante… che savevo za… ma no ghe pensavo pí,

ciapá come che so de sti dí:



“ …mejio de sercare novi amissi ogni di:

ze curare puito quéi che gavemo ancó…!”



´l ga pienamente rasón.



Cari amissimondoveneto ,dee olte , i mesagi che se inviemo i porta a rifletere , a pensare , ogni uno co a so testa , naturalmente .

A frase de sora , dell'amigo Graziottin .... co la go leta .....a me ga fato gratare a testa , no pai peoci , ma parchè trata eà cusita , no a me piase .

Bisognaria partire da on concetto : cosa zea l'amissia ? Chi xei i amissi ? Quaeo e scopo de deventare amissi ? Xe mejo tanti amissi cussì e cussì , o pochi e boni ?

Pararìa fasie rispondare ,fasie da intendare , ma forse no a xe proprio cusita.

L'amicissia credo che a sia on regaeo che gnen dal core ,xe amissi chi se voe ben , ga sensassion in comune ,xe amico chi da sensa domandare , chi no pretende , chi che se impegna , chi se sacrifica par ti in cambio de sta amicissia ......

Dixe il proverbio : chi cata on amigo , cata on tesoro .Essere amissi vol dire condividere tante robe .........no tute però , (esempio ... a molie no a se condivide....) .

Parchè deventare amissi ? Se deventa amissi quando se stabiise on insiene de interessi , aspirassion , sentimenti , somegianse .L'amicissia a xe na roba che nase sensa impiantarla , ma a voe coltiva'.

Xe mejo tanti amissi o curare quei che ghemo...?

Xe mejo sercare sempre amici ,co nove amicissie se fa deventare pi forti anca chealtre.

A ricerca de nove amicissie a xe importante parchè no se va in serca soeo pa ricevare , ma sora tuto par dare.

Amissimondoveneto se propone so sta ricerca e sinceramente no capisso quaea cura che poemo darghe a quei che ghemo e che no ghe demo.

Amissimondoveneto ve serca , e na volta catài a ve da l'opportunità de dialogare co noaltri e co tuti , vere inisiative , darme na man.

Gnente vien domandà in cambio , nessun impegno , soeo essere amissimondoveneto .

Par queo che poemo serchemo de darve che e notissie da casa nostra ,parlemo co stessa lengoa che ne xe comune e serchemo de catarve par catarse .

Noaltri no ghemo nesuna organizassion ae spae se non che a bona voeontà ,no ghemo gran conossensa de siti , blog o altro , ma semo riusii a creare on blog de riferimento .Serto ghe xe de mejo , ma se si pi brai deme na man .Essere amissi vol dire condividare.....o no ?

Chi serca da noaltri l'amicissia co e pretese ....forse sbalia......

Dopo questo , digo che ghemo dato , ogni uno , secondo e so possibiità queo che ghimui a disposission.

Secondo mi , ghemo da continuare so sta strada ,diese , sento , mie nuvi contatti ....chissà che nassa sento , mie nove amicissie co a voja de dare , co a voja de fare.

On saeudo caro a tuti e co a benedission de Frei Rovilio , daea so nova postassion de laoro rente el Padreterno .Frei Rovilio ghea capìo el senso de amissi mondoveneto

el gavea capio a nostra sincerità e pur esendo on grando , el se ghea avicinà aea nostra picoea inissiativa co umiltà e amicissia , quea che noaltri sercamui , quea che eo sercava .



Roberto Giovanni Zaniolo Da Villa del Conte - Padova