Renato Grando

Contemo un pochetin sora la storia che ga dato el inicio de la imigrassion italiana.

Contadini del norte de la Itàlia – 1875
Na stòria de fame e sofrimento
La Mèrica – na speransa
Ntel ano de 1875 ga scominsià rivar al Brasil, le prime fameie de contadini véneti, de la region norte de la Itàlia. De più de novanta par sento dei imigranti italiani vegnesti al Brasil i zera contadini.
Contadini del véneto zera i laoranti de la rossa, de le tere vénete. La maioransa, no i gavea tera, gnanca casa. I contadini laorea ntele tere a truco de na parte dei produti agricole che i catava sù. La parte più granda de la produssion tochea darghe ai paroni de le tere.
Le tere zera magre e adubi ghinera mia. Par adubar le tere, i doparea sol el sterco de le poche bestie que i gavea. E lora, la produssion la zera sempre scarsa.
I contadini zera sploradi par i proprietàrii de tere e i so vassali. Come i ndea de star ntele case dei paroni de le tere, ghe tochea pagar el afito de la casa.
La Itàlia, un paese con pochi recorsi, sofrea con quase un sècolo de guere che ga sucedesto vanti de la unificassion italiana.
I poareti contadini passea fame. In stato de miserabilità, i contadini infrontea anca, le malatie che copea na mucia de gente. Zera un pòpolo sensa speransa, sensa futuro.
Cosita, vivea i nostri antenati, i nostri parenti, e nostri bisnoni.
Dopo de rebelarse contra i governanti italiani, i ga scominsià emigrar al Brasil. “Ndemo a la Mèrica catar fora sta cucagna!”