EL SONAR DELE CAMPANE

EL SONAR DELE CAMPANE.
Honório Tonial

- Tosati, su dal cucio, che lè ora de ndar al paese.
El caval Dolar, la ègoa Tigre e el me Petisso bianco i è belche in stala co la pansa piena de spagna.
I colombi i verdea el beco, sussurando lamurie festive. E la luna la guidea le stele in medo ale nùgolete de bombaso.
Infornie le bèsie, col bassiero, la carona, la sela el spansal, i pelegri e la badana bisognea rangiar le stafe conforme la longhessa dele gambe dei cavalieri.
No podea mancarghe el sicoto o na bacheta de codogner..
- Gaveo fato el Segno dea Crose? Dimandea el pupà che lera religioso.
In pochi menuti gèrimo vestidi e pronti par viair i sete chilòmetri dea stradela streta, piena de sassi,diverse rive , tante voltade in meso el mato.
Due toponi i ga travessà el trodo e la egua Tigre, pasarignera, la ga supia forte!
Dal montesel dea foresta el sol e ga semenà i primi ragi, anunsiadi par la sonora sifolada dea coaieta vigilante.
Le simie, insima i pini le ga scominsià la so spaurosa cantoria e i papagai serani i ga scominsià a zolar martelando con le ose rauche.
Se respireia la àrieta fresca, profumada de fiori dea selva.
Su par el monte de Fracasso, el Petisso el se ga fermà parché el spansal el se gavea smolà.
Alora son dismontà e Ricardo, me gradel pi vecio, el ga rangià el fornimento.
Par strada gavemo incontrà divers persone che le se ga imucià e ghé saltà fora na vera procission.
Bèstie de tanti colori, montade par veci, zoveni, giuventù, uno o laltro bambin in brasso dea mama, senatada ntel so selin.
I tosati e le tose i scomissiea a far el so grupeto, profitando par far morose.
El ciacolamento el se misturea a le ridade e a le tosside.
Fin che semo rivai al paese.
ln paese i costumea viver così parché i laorea ntele fàbriche, ntele indùstrie , ntele case de negòssio, ntele ofissine ..
Semo rivai ala cesa e gavemo ligà le bestie ntel stangon fato aposta.
Le campane le gà scominsià a sonar.
Parea che el so blimblon el vignia dal celo!
Me ghè vignisto su el pel de oca.
No gavea mai scoltà sta armonia musical!
Le colombe e le rondinele, zolando a le sgoelte, le parea ringrassiante.
Trè moneghete le ndea su par la scala, in prèssia, par no perder el scomìnsio dea serimonia.
Ntea ora dea consacrassion, el sonar dele campane el ga riornà con tanta intensità che le persone le sbassea la testa, indenociadi e i ceregheti i sonea el campanel, tignindo alsadi i paramenti del piovan in segnal festivo.
Semo ritornai dopo messa ed, par strada, me parea de scoltar, nantra olta, quele divine sonade.
De note me gò insonià e me parea s coltar el ribombo del campanil.