DI DEA MAMA - LUIZ RADAELLI

• Me mama
  Adesso, passadi oramai na sessantina de ani, co scomìnsio a pensar sora el tempo passa, co ero picolin, me par de veder me mama a laorar par far i laori de casa, a prontar el magnar, monder le vache, lavar le robe ntel lavèl postà ntel rieto.
  Far e cosinar el pan, spassar la casa, ténderghe ai fioi e anca el pòro pupà, tra tanti altri afari.
  No me ricordo de mai verla sentista dir che la zera stufa con tanti afari che la gavea de far tuti i di, come se fusse le conte del rosário. Seanca no la gavea bona salute, la ga bio Oto fioi e la ga tendesto a tuti co le medèsime caresse, afrontando le dificoltà che ai di de
  incoi tanti no i fa mia idea de come se  tribulea par slevar i fioi e farli vegner grandi co la salute e i insegnamenti cristiani.
  Me par de vederla col fassoleto in testa, el grembial ricamà davanti el vesti, co na scarsela ndove la urtea el fassoletino per quando bisognea sugarse la fàcia, le sinele ntei pie e el sugaman su le spale, la la scoa a balar ntel soaio dea casa, co na sgoeltessa che lera fin bel de veder.
  Adesso la vedo co i so novantassincoe ani, co i passi vassilanti, incuciada soto i cavèi bianchi e co la memória persa ntel trascorso dei ani, ma seanca tuto questo, tuti i di ringrassio a Dio de ncora gaverla insième co noantri. No lè mia tuti che ga na gràssia così e chi la ga, bisogna tègnerla come un tesoro, un tesoro che sòldi no i è mia   boni comprar.