JOVINO CASTEL - I Ignoti

I Ignoti de Honório Tonial
Depoimento – Jovino Castel

Go finio de leser “i Ignoti “ de honório Tonial, e ala prima lesesta, (vol dir che questa zé la seconda), go dito che me tochea tornar in drio a cercar qualche difeto, che se nol ghe zera, fursi al ghe manchea. Confirmo che el ghe manca el difeto de tirar la stòria pi lunga. Na stória no ocor esser lunga, tanti romansisti gan scrito stórie curte, ma na stória che zé de agradàbile de leser, non se volaria che se fenissesse tanto presto.
Ma, sarà fursi questo che fà de Honório Tonial um grando romansista. Sara so stilo esser drito e sceto, sensa imbroiamenti, risolvendo súbito le crise dei relassionamenti. El scritor vive da svelto e, sensa perder tempo mostra bonoriva la essência de rivar súbito al scopo.
Econômico co le parole che le cata care e preciose, e com queste non fà desperdíssio fàndoghe poco caso ala morte che la se cata fiaca devanti la granda voia de viver e de far futuri nte la nova Pátria dei nostri Ignoti.
I so personagi, lu dize che sono fictissii, ma mi cato che sono tuti da vero che ancor ancoi ghen nasse, vive e more tuti di ntela nostra granda Nassion Taliana.
Sono omi e done, omani, com qualità e difeti perfeti pal nostro atual stasio di evolussion.
Liviani, i so pecati, gnanca um degno del inferno, gan implìssita la scusa del celo, parche sono persone che gan tanto amor. No go visto secso esplìssito e par questo no se pol farse maraveia se nò c ola hipocrisia de catar che sia robe de altro mondo e che quà non se fà.
Sensa secso non ghe saria la omanità che sarà finia suito dopo finio el secso, quando saremo tuti angeli alora. Là fursi se fará sol veramente el Amor.
Go messo in balansa i tradimenti de le done e dei omi del romanse. Se fà tanta maraveia el spìrito maschio davanti el tradimento de na dona, ma Honório gà fato le parte giuste. I omi non pol lamentarse, principalmente parché per tradire se no zé co na putana, tocarà esser co la dona del amigo o del vissin. Par questo che fursi Honório, sensa misterii gnanca dolori, fà le riconsiliassion com tanta fassilità, parche el cata che omi e done nos gan debiti in tra de lori.
Nantro aspecto de la filosofia secsual de Honório me gà savesto tanto saliente zé la assoluta liberta; tuto zé stato fato consientemente de lìbera volontà, come gà dito la tosa al prete al confissionàrio se la gávea fato contro la volontà, e la ghe dize: – Nò padre, zé stato contro la taipa dedrio la capunara.
No go visto stupro né violensa. Podemo dir, alora che, Honório, ai otanta, gà fato secso cola potensa de um zoven de vinti traverso i soi protagonisti.
El auge de la opera de Honório me gà savesto esser la emossion. Sarà um difeto brasilian prianzer per um ritrovo, o cose someiante, ma ritrovarsi fradei, gemei, genitori em um tempo lontan e in uma Pátria distante gà na carga de sentimenti emotivi come quando nasse o more um fiol. Par de veder la man de Dio a far la condussion del caretel de la stòria par che la se fenissesse polito come sarà stato el desídero del letor al scominsio del libro.
Se no el ghe na altre stòrie de scrite o in mente, e che Dio ghe daga arquanti bei ani par che le fae vegner fora, semo davanti de um GRAN ROMANSISTA DE UMA STÒRIA SOL, parchè la grandessa de um romansista non se misura contando i nùmeri dele pàgine del libro, ma par la carga de emossion, par el resgate stòrico, par la fassilità de la linguage, e par che nò par la simplissità.
Sono sordi e orbi i cinematografatori al potensial de “I Ignoti” o sono insiminii col fetisso de la morte che consagra i scritori, i poeti, i pintori, cantautori, dispresati in vita come veri Ignoti?
Me gà savesto esser na stòria tanto mia, che se un antenato mio el gavea qualche spìrito in torno che se fea sinter, son seguro de esser mi, in garupa de lu aspetando la me ora de nasser.
Alora, mi ghe digo ai letori, no stè perder questa oportunità de refar questo viaio de la Itália al Brasil coi Ignoti, a imparar cola risserca romàntica de Honório, come èrino noantri vanti de nascer in questo mondo de ancoi, cosa feino, cosa sentiino, e far la descoperta de che, epure, pi de cento ani, non semo tanto difarenti, femo ancora i medesemi pecati, e co le medeseme fiachesse, pinpian, cola evolussion, stesso andemo avanti.

Porto Alegre, RS, 22 de fevereiro de 2010

Jovino Castel