E L F I O R E T O

[editar] EL FIORETO
---EL FIORETO.
Honório Tonial

L´era na spèssie de novena che se fea al mese de maio, in preparassion a la Sagra del di 26, festa dea Madona del Caravaio, lo zo al Boa Vista, Sananduva. Se cantea el rosàrio in Latin: "Ave Maria, gratia plena...Santa Maria Mater Dei",.....,se dizea su i misteri gloriosi e se cantea le lode a la Madona. Queste lode cantade in Italiano. Scominsiando là par le oto de sera el se finia darente le diese, dopo del Dio Sia Benedeto...! La pi parte, pena vignisti casa dea colònia, i se scambiea de roba e vignia, a pie, grandi e pícoli un drio laltro. Finia la serimònia, se ndea fora dea cesa e el primo fabrissier Bepo Chinàia, el dea i avisi. " - Stassera scominsiemo la programassion par la festa del di 26 de maio, in onor dea Madona del Caravaiio - I Nanei i pareciarà 200 spéi par el sorasco. - E ghe vol che i sia de "guamirin" par no farghe spussa o gusto tristo a la carne,,,Ghe dontea Gigio Aio. I Dalaio e i Bruneto i menarà na carada de legna paromo, el di 25. - Angichi, naransere da mato, gràpia o guagiuvira... Avisea el Madei La faméia de Giusti la taiarà le fòie de palmira par far i archi dea procission, lori che i ga pràtica... La fameia de Ricieri Bachi la farà la netìssia intorno a cesa. Diman de sera ndaremo avanti co la programassion. Par stassera, Bona Note a tuti..!" - Bona Note e bon riposso.... i dizea tuti. I pi zóveni i corea in volta, al ciaro de luna, tuti contenti.. Le tosate le se metea a brasseto e le partia davanti... I tosati, pena dadrio i ciacolea forte par farse sentir... I pi veci i scominsea cantar el Ciareto Su Quel Monte, el Monte Grapa, El Iera Sera Andando a Spasso... e così vanti. Dopo i ndea a casa riposar, par levar su bonora e ndar in colonia, al di drio. La nostra fameia la era granda, sereino le porte e , via tuti a Rosàrio..! El nostro pupà : Matteo Tonial, l’era Professor e el fea parte dea cantoria. In cesa, se gavea due file de banchi, davanti el altar, co i so balustri e i nici dei santi. Dadrio del altar ghera la sacristia co i paramenti dei sacerdoti quando i vignia far le vìsite, qualche sepolimento importante e ntele feste. I tosatei e le tosete i restea davanti, o sia, ntei primi banchi. I omi e i tosati a la banda sanca e le tosete, le done e le tose , dea banda drita. Quei dea sanca i fea la prima parte dei canti e dele orassion e quele dea banda drita le fea la seconda parte. Tute le sere, dopo del rosàrio, la programassion dea Sagra la ndea avanti. – “Chi elo che va comprar le vache..?” Dimandea el Bepo Chinàia. – “Mi ghinò due tea stala e , se ocore, el me vizin Selmo Perondi el ghinà due anca lu.”.. Dise Gigio Bruneto. Dopo de ciacolar un paro de menuti i ga catà la solussion: Due vache de Selmo e una de Bruneto parvia del peso dele bèstie. – “E a casa de chi, meteremo el Frate..? - Da Cencio Tonial che lu el ga la casa granda e l´è ben postà” Nostro zio Vicente léra maridà co la Maria Boareto, el gavea na bela casa, darente a cesa e na fameia granda: 14 fioi, ma el gavea de tuto quel che ocore a casa de un agricoltor de quei tempi lá. Fin na ragna par ndar al paese. – “Le Figlie de Maria le pareciarà el altaro co le toaie, i castissai, i fiori e tuti i paramenti. - Gioan Chinàia el sonarà la campana e Selmo Perondi el se incaricarà dei mortari, foghete e rochetoni.”.. Finida la programassion i se inviea banda casa. I Perondi, Bruneto, Madei e i Tàrtari , Dallaio e Bachi i ndea banda el Tigre: i Chinàia, i Fracasso e i Tonial in diression al Gauavirova: i Nanei, i Picinin e i Giusti, banda Santa Apolònia.. Un grupeto el scominsiea i canti dei nostri imigranti: - Go Girato l,Ìtalia al Tirol... Nantro grupeto el ghe rispondea: - Na Vrginela non posso trovar... Nantro grupeto el ritornea: `- Ciareto Su Quel Monte.... Quelaltro el rispondea : - Giulieta, la Piu Bela.....
EL DI DEA FESTA. Gnanca na núgola tel celo e le rondinele e le sisie le tàia el firmamento saludando el sol chel spunta pien de luce e caldo! El sonar dea campana el se mistura col s-cioco del mortero e le persone le camina a le sguelte. Grande e pícoli, a pié, a caval, de ragna o de careta le forma na vera procission, saltando fora de tuti i cantóni… Ben vestidi, co la facia ridente i và rento ntea cesa par ciapar i meio posti… El altar el mostra i fiori e le toai bianche, piene de candele. El Frate el mete su i parmenti e i fabrissieri i impissa le candele…La cantoria la verde la serimònia con na lode a la Madona del Caravaio… El sacristán el porta el misal con tuta la reverensse.. Tea consacrassion le persone le se indenocia e le suspira\ devossión e adorassión. E, sta olta, la sagra la è cascada pròpio ntea doménega… Que festa..! Gh,è vignista gente de tuti i cantóni : Dea Guavirova i Guzzo, Dalla Santa, Bianchi, Carbonera, Trentin , Paloschi e altri. I Pansera, Predebon, Silvestrini, Pagnoncelli e Slongo, tuti bergamaschi da San Gaitano… Dal Pessegueiro, rivea i Bof, i Fracasso, i Testa…. Dea capela Santa Apoliania vignia i Bachi, i Sganzerla e el Bejano..!!! Questo l.era el ùnico straniero chel parlea el Portoghese , Magari, lntrà de lu sol, parché nissuni i lo capia.. E tosati e tose i vignia co i so cavai inseladi con pelegri ,badana e rédene nove..! La mama la verde la finestra, la respira fondo e la mormora: “ Che bela giornada..!” La Madona la se mèrita…!” Se scolta el primo s-cioco dei mortari e i gai i scomìnsia a cantar. I cavai i scominsia a corar par i potreri.Par fin che la natura la vol far festa anca ela. La gente la core a vestir la roba nova, vardarse tel specio e inviarse par la strada, in diression a la capela. Veci e zóveni, grandi e pìcoli, omi o done tuti i camina a le sguelte, par no ciaparse indrio.Magari, dopo de ver serà le porte dele case. La messa, la procission, la prèdica i deventea sucedimenti che i assea la gente comossa..! – Quanta devossión..!? Al mesodì se magnea el sorasco. Par i tosatei e par i vecioto se gavea i dolsi de pasta e i bussoloti. Na spèssie de cuca intorciada… No posso smentegarme del primo sorasco magnà a la Sagra dea Madona del Caravaio : El scarpo de vaca…El me ga costà un patacon guadagnà ntea Roda dea Fortuna. E par bever go tastà, par la prima olta, el Refresco de Manèsia Bergamini..! Me par in cora de sentirghe el gusto…Dolse e frisante..! Finio el disnar, là par le due ore, i omi i scominsea a zugar la mora e intonar i primi canti populari taliani: Ciareto Su Quel Monte, la Bela Violeta, El Massolin dei Fiori, la Bela Polenta e tnte altre. I tosati e le tose i scominsiea ndar a spasso in grupeti par smorosar… I tosatei e le tosete i fea i so zughi: El Campo, i Quatro Cantón, el Fassoleto , el Anelo e altri…. A le quatro, se ritornea a la cesa par dir el rosario chel se finia col “Dio sia benedeto”. I veci, le done e i tosatei i scominsie a tornar a casa, compagnai de quei che i stea distante.Al di drio dea festa i fabricieri i fea la Resa dei Conti e i vendea i porsèi e le galine che ga vansà.El di de incoi no se fà mia pi sta bela fgeesta..!