AJNIVERSÁRIO

LA PREVISION DEL TEMPO.
Honório Tonial

Na olta no se gavea i meteorologisti con i so strumenti.
La natura la era la maniera de preveder el tempo.
Na sera de luna, lavia al Boa Vista, Sananduva, go visto el bùlgaro Neco, vignisto de Cacique Doble, butà in tera, de na banda, con la recia incostada ntea tera e dando pugni pimpian e dopo sgoelto e con tuta la forsa..
Son ndato ben darente e go dimandà:
- Neco, sito malà o sito drio restar balordo?
- Son drio scoltar par saver se sta note o diman vien piova..
- E come setu?
- Quando el baruio del mar lè massa forte, vien piova. E se, dando pugni , el ribomba, te poi spetar la tormenta e la tampesta.
I nostri veci i disea:
“- Rosso a la sera, bon tempo se spera.
Rosso a la matina, piova o spiovesina.
Fumana alta, la piova la casca.
Fumana bassa, sol anca massa.
Brina sul pantan, piova incoi o diman.”
Vento ntel nassente, fredo ben darente.
El rospo travessando la strada, piova la è ciamada.
Quando el baranco dea strada el ga umidità, vien piova.
Fin le saracure le anùnsiea el tempo... Magari, poche olte sucedea giusto.
Però, le sìmie ntea orla del mato, co na mùsica stramba e rauca, la piova lera un fato e i troni e i lampi i anunsiea le saete.
Incoi i meteorologista, nò sol i anùnsia el tempo ma, anca i dise la quantità de sentìmentri e anca se ghe zé temporai. \
La fùria del vento la è misurada in chilòmerri de velocità e la durassion durane tuta la stimana.
Ntei nostri tempi, quá a Erechim i conta che un locutor dea Rádio Erechim el metea fora na man par la finestra e el disea:
Cari scoltadori, incoi el tempo lè bon. Diman matina, noantri lo savaremo e mi ve lo dirò.
Se no ghe crede mia, podi dimandarghe a la profesora Wanda Maria Fontana Tonial, me carìssima sposa, che la compisse incoi, dizassete de luio, 83 ani e la gò in compgnia dal ano 1950, fin incoi.
Vui assarghe un eterno baso e la speransa de poder ndar avanti nte sta bela vita!
Gò imparà ntea fìsica quàntica a misturar i sucedimenti.
El me saludo a tuti, spessialmente ai taliani de tuto el mondo.