LUIZ RADAELLI DEL BOCAL

STÒRIE DEL BOCAL



Sti ani indrio le cose le zera diverse dei dì d’ancoi. No ghe zera mia tute le comodità che ghemo adès, nemeno la eletricità, che con ela gavemo una variansa de spotaci, che se i nostri noni i podessa tornar in drio, luri noi saria boni de capir quanto el mondo el ga cambià in pochi ani. Gavaria anca quei che i’ndea dir che el mondo le roverso, e che la fin del mondo la ze drio vegner, principalmente se i’ndessa a le spiage, e i vedessa le done depi nude che scoerte.
Ma per parlar in cambiare, me vien in testa un raconto del nono Bino, che ghe piasea contarlo e dopo el moleva fora arquante dele so bele ridade. El contea che sti ani ndrio, quando sucedea de far qualche festa quando se maridea coalcuno, ghenera sempre quei che ghe piasea farghe i dispèti. E in te un paeseto, un sabo matina, se ga maridà un toso e na tosa. I so genitori i ga fato na comemorasion ai sposi, co na bela zupa de capeleti, galine col pien, sorrasco de diversi tipi de carne, salata, vin del ciodo e anca la gasosa per le done.
Dopo magnar e bever a la volontà, ghe zera un momento de le nosse che i fea la inaugurassion del bocal: i impieniva de vin sto bocal novo e i lo dava de bever ai sposi, ai compari, ai genitori e anca al prete sel zera anca lu. Lora si el zera considerà imprimà. De li avanti i podeva meterghe rento altre cose e nò più el vin ……..
Ma in te sto paeseto chel nono Bino el se ga slevà, i conta na stòria del bocal un tanto diferente, quela de una mama che se stimava de verghene insegnà tuto a la so fiola, sora cosa e come zera la vita de na dona dopo maridada.
- “La se marida vèrgina”, la ghe confidensiava a le so comare. – “Ma la se porterà come se la gavessa gran speriènsia, perchè ghe go insegnà tuto, ma pròprio tuto, sora tuti i afari de sposa….”
Dopo la festa de matrimònio, el bocal - imprimà col vin, d’acordo col costume, ma romai ben lavà, el spetava soto el leto el scominsio de la so mission poco gloriosa. I noivi i se ga butadi in leto e dopo un serto tempo, a la sposeta ghe vièn la voia de pissar, la se alsa e la tol el bocal chel zera soto el leto. Ma sucede che un poco vanti dei sposi ndar in leto, quei dispetosi che sempre ghe piasea far dispèti, i ga metesto rento, in fondo del bocal, una bela sbrancada de sal de fruta, de quel che se beve co l’ácqua quando se ghiná el mal de stòmego. Come la luce del ciareto no la schiarava polito, no la se ga mia nicorta – savè, coel tempo la no ghe zera’ncora mia de pagar la conta de la luce a la fin del mese, come adès.
Ma la sposeta la ga percebesto suito che intanto che la pissea, el boir el fea vègner na spiuma alta, che la vegnea fin el òrlo del bocal e la spiuma ghe sfredava serti posti e anca serti mistieri. La gà ciapà un bel poco de paùra e el sposo, descognossendo anca lu sto fenòmeno, el gà speigà a so dona che quela la zera una cosa natural, e che de li avanti la sucederia sempre…

Magari, al giorno seguente, tuta piena de pròsia, la sposeta la ze ndata trovar la mama che stea darente e la ga cobrà de so mama, coel punto fiaco del so corso de educassion sessual. La ghe ga dit: - “No te me ghè mai deto, mama, che pena dopo far el laoro, el pisso el diventa de boire de più de una sciampagna, scoasi spandendo fora del bocal……

Imagineve alora…… che per più che se impara, no se sa mai che basta.