Luiz Radaelli

RICORDI DE NADAL



Zera note de Nadal. La luna tonda, la parea na granda moneda, che ogni tanto, zera sconta par na nùvola. Cossí stesso, la luminava tuto el mondo. Èrino pìcoli e credevèn che´l Bambin, a caval de na musseta, via par la note, el ne portava i regali. Tuti i ani ghe domandeven tante bele robe, soratuto, quele par giugar e schersar. Ma scoasi tute le olte el ne dassea tei piatèi ncora sporchi de semola, arcoanti dolsi e carameli col formato de pessi. Dele olte, coi ani ndea mal in colònia, el ne assava sol arcoanti dolsi de pasta, tanto compagni de coei che la mama fea e la picava via, alti, te na sestèla de stròpe, senò, co la se nicordea, noantri li magneven fora tuti. Stesso così èrino contenti.
Adesso, ai giorni de ncoi, come faremo darghe da intènder ai nostri fioi e nipoti che´l Bambin vièn co na musseta a portar i presènti? Tanti tosatèi i cognosse la musseta solo tee stampe nei libri. Sèmole? Mai sentio dir. E i dirá: - “Saràla roba bona de magnar, o saràla na bestema sta sèmola? “
Ma adesso i tempi i ze pi moderni che da ani indrio, co noantri èrino co la vostra età. Adesso el Bambin el vien portar i presenti de camignoneta e no ocore gnanca sèmola e ne feno, parchè la va a òio. Ghe penso che’l Bambin, de na maniera o de laltra no´l ga mai dassà de vegner te la note de Nadal. Se no´l podea portar dolsi, el ne portava pace e speransa. Èrino sicuri cossì, che’l se ricordava anca de noantri, pòveri fioi de contadini. Ve desìdero un bon nadal, una bona fine e un bon scominsio de ano.

Colaboratore: Luiz A. Radaelli - Lajeado