CAPIDA A LA REVERSA

EL RETRATISTA.


Nte un paeseto ghe gera scoasi solo gente vecia.
Parché i gavea paura de perdar la semensa el Governo el ga sbassà na lege che la obrighéa tuti coei che i se maridasse, a slevar almanco un fiol, dentro de sìncoe ani, sinò , le autorità ghe tochéa far le providense necessàrie.
Bepin e la Pierina i zé rivadi ai sìncoe ani de matrimònio e gnente de fioi...
El di giusto, Bepin el leva su bonora e el ghe dise a la so dona:
- Pierina, incoi fà sìncoe ani che semo maridadi e no gavemo faméia. Te sè come che zé la lege. Vignarà coalchedun del goerno ... Mi me toca ndar laorar e ti te li tenderè..!
- Far cossa... Vedaremo cosa che i vol...
Là par le diese riva um Ritratista de Tosatei, magreto, vecio, co la barba longa e meso gobo, chel se gavéa sbalià el indirisso.
El bate ntea porta, vien fora la Pierina e i ga scominsià queste ciàcole:
- Bon giorno, parona...
- Bon giorno . Cosa volio?
- Mi cato che vu savé parché che mi son vignisto coà incoi.
- Ben... si... cato che si...Vigni rento e senteve.
- Prima de tuto vui dirve che mi son el meio profissional par far sti mistieri. Ntel me laoro gnanca el véscovo nol me guadagna..!
- Marìtene..! Ve credo anca, ma mi me spetea nantra persona, almanco pi zóvena......
- Vardé chel zé belche un paro de ani che mi fao sto laoro e ogni olta el deventa mèio..! Ghin fao de bianchi, de negri e de tuti i colori...
- Maria Santa..! Alora gavi pròpio tanta pràtica.
- No sò farghe la conta de quanti ghenò fato fin adesso . Passa mila..!
- Santíssima..! E no deventé mia fiaco..?
- Nò...nó. Pi che ghen fao, pi voia me vien..! El zé el amore a la profission..!
- No sarala mia la passion..?
- Se volì, podemo scominsiar suito. Tosatel o toseta..?
- Tosatel...tosatel. No volemo perder la semensa..!
- Ma, prima de tuto vui mostrarve el me laoro: ( El verde el mostruário e el mostra el ritrato de um tosatel scuro come el calìdene del fogon)
- Vardé questo. Nol zé mia pròpio bel..? Lo go fato ntea ligna de ônibus, piena de viaianti.
- Santa Madalena..! El ve pararà pròpio bel...
- E questo..? Lo go fato ntei scalini dea catedra, pena dopo messa prima.
- Santíssima..! Che sacrilégio..!
- E sti due gemei... Vardé che belessa..! I go fati ntel giardin dea piassa. Ghe gera na mucia de gente drio vardar. Savi... Ghe zé sempre i coriosi..!
- Maria Vèrgine..! Cose del altro mondo..!
´- Alora podemo scominsiar:
- Ghen femo uno ntea cosina, nantro ntel caregon dea sala, nantro ntel leto e nantro ntel cesso ( bagnero)...
- Maria Santa..! Tanti cosita..?
- Dopo de pronti podì scoier el pi bel o anca tegnarli tuti..!
- Ben...ben...Son drio deventar storna.
- Savé chel altro di mi gera drio fàrghene uno soto na pianta e ga scominsià a piover a sece reverse... Squasi che ruino el me stumento...!
- Santo Celo..! Che bruto perìcolo...
- El gávea scominsià a faiar, ma mi lo go fato rangiar da un spessialista e adesso el laora meio de prima.
- Pol esser.... pol esser...
- Ben.. Adesso scominsiemo de na olta.
- Ma mi no sò come far, parche la zé prima olta, co na persona strània.
- No stè passionarve..! No zé mia fadiga e faremo ben sgoelti..!
- Gavaria pròpio caro anca mi..!
- Intanto che ve parecé, mi monto el tripié ...
- Santíssima..! El tripié? Ghe ocore anca coel? E parché ?
- Par tegner su el me strumento chel zé pròpio grando e el pesa massa ..!
( La Pierina la va in fastìdio e nte sto momento riva el Bepin chel la fa rivegner
Nissuni i la ga capida drito
. Ntea prèssia, el ritratista el se la ga fiocada,smentegando el so strumento!
Bepin lè incora drio gratarse la testa, sensa capirla e la Pierina la dise che la gá na spissa che mai!