SANANDUVENSI NTEL MONDO

SANANDUVENSI AL MONDO
Honório Tonial

Son vignisto al mondo ntel di 28 de marso de 1926, ntea Linha Boa Vista, capela dea Madona del Caravaio a Sananduva-RS.
Fiol de Mathias Tonial e Adelaide Dagani che i ga bio questa fameia: Gentil, Ricardo, Gervasio, Orlando, Cornelio, Roque, Honório, Clemente, Cassiano, Olga, Geraldo, Miguel, Ivo e Elias.
Pròpio 13 omi e na dona.
I abitanti dea nostra comunità i era tuti imigranti taliani che i parlea i so dialeti.
Fracasso, Tartari, Tonial, Perondi, Giusti, Picinin, Dallaio, Amadei, Bruneto, Zenere, Bachi
Dopo de tanto tempo insieme ghè nassesto el Talian che tuti i lo capia e parlea.
Nissuni i savea el Portoghese che noantri ghe diseimo “bresilian”.
La prima parola che go sentio, el la ga pronunsiada Bepo Tartari (Chinaia}, na sera dopo el rosário del Fioreto, el di vanti dea sagra dea Madona del Caravaio, ai 26 de maio.
- Patrissio, diman portar le galine!
- Cosa elo sto patrissio? Go dimandà al me pupà.
Gnanca lu nol savea.

EL FIORETO
Lera na devossion che se fea nove note vanti del di Di de Sagra, 26 de maio, in onor dea Maona del Caravaio, patronessa dea nostra capela.
Se cantea el rosario, in Latim e dopo del “Sia Benedeto” se scoltea i avisi pareciando la festa.
Ogni fameia e entità religiosa le ricevea la maniera de partissipar ntea festa.
El preidente dei Fabrisieri el dea i avisi ntea scala dea cesa e tuti i se postea davanti par scolta.
- Le Fiole de Maria le lavarà la cesa e le fiorirà el altar;
- I Cavalieri dea Croce i farà la rossada intorno a cesa.
- La fameila tal , la farà i dolsi de pasta.
- La fameia altra, la portarà la legna par el sorasco..”
- Pareciar chinhento spéi de sorasco, de guamerin
- Tor su la questa de casa in casa.
E cosita avanti el montea la programassion dea festa. un tocheto de ogni sera.,
Pi tardi go savesto chel volea far referensa a tui i soci dea capela.
Noantri impareimo la dotrina cristiana ntel Italiano Gramatical e anca le orassion e le Lode Sacre.
Magari se preghea el rosàrio in latim. Anca la messa la era cosita
La Ligna Boa Vista lera distante 7 chilòmetri dea Vila de Sananduva.
La ùnica strada la era streta, in meso el mato, piena de sassi e con tante voltade.
Se ndea a messa a la doménega, a caval.
Le done e le tosate le ndea montade ntel selin.
Par ndar al molin se ndea a caval o de careta, tirada par na giunta de
boi de canga. O due mule.
Noantri laoreimo in colonia piantando formento, milio e riso; patate dolse e patate taliane; fasoi, suche, ingurie, meloni e cocùmeri.
A casa se gavea el orto con vanesse de salata, radici, scarogne e altre verdure.
I porsei, la vaca da late,le galine e el vignal i fea parte de ogni fameia.
Ntei rieti del Boa Vista podeimo pescar le sardele, i gobi e altri pessi che la nostra mama li rostia e i magneimo con la polentina.
Anca se podea catar fruti da mato:guavirove, sarese, pitanghe, buticave , raticu, more, guavigiu,e altri.
Se piantea naransere, bergamotere, limere , pereri. brognere, codogneri, vigne e alti fruti, come noghere e pongranà..
Anca se ´podea copar tanti osei, come le passarete che le magnea i grani de formento semenà. .
Colombi, galinete, coaiete, morete, becassochi, tordi, macuchi e altre spessie de osei i fea parte del cardapio de quei tempi.
Bei tempi che no i ritorna mai pi.