ABECEDARIO

A B E C E D À R I O .

Honório Tonial
Introdussion.
PAROLE..!
El nostro Talian el dòpera solamente vintiun segni o letre par formar tute le parole del mondo..!
Sìnque vogae e sédase consonante.
El par un vero miràcolo poder registrar, no solo na lìngua, ma anca la Cultura, la stòria e la memòria de tuta na generassion.
Misturando le vogae e le consonante formaremo le parole.
Quando queste le deventa nome de qualche cosa ghe ciamemo SOSTANTIVO.
Par ricognosser la identità de na persona, la meio maniera la è saver che lìngua che la dòpera par far comunicassion.
I nostri bisnoni i ga insegnà ai nostri noni. E i nostri pupà i ga fato che noantri imparéssimo la so maniera de parlar .
Se no la rincuremo la sparirà...
Go idea che i nostri antenati i è drio remenarse tel tùmolo con la volontà de racomandar a ogni uno de noantri :
- No stà assar che el nostro parlar el vaga in malora...!
Par questo, volemo scominsiar co na pìcola storieta che la servirà de motivassion par el stùdio del nostro Talian.
Un sordeto el roseghea un toco de formaio de quel bon da gratar.
Quando el se inacorde, el vede un gato chel vol magnar, nò el formaio, ma el sordeto
Questo el core a scóndarse te un buseto, soto a cassa dea legna.
Tremendo come na stropa, el ga pensà:
- Mi stao chieto, el gato el se stufa, el va via e mi torno a rosegar el me formaio.
Passada na mesa oreta el sente sbaiar...Au.. au... au....!
- Adesso posso ndar fora parché el gato l'è ndato via...
El mete la testa fora del buso e el sente le ongiade del gato...!
- Ma, te gh'è sbaià come un can, seanca te si un gato...!
- È...caro.. Ghe dise el gato. El di de incoi, chi no sà almanco due lìngue l'è perso..!