Scríver par véneto chipileño] Néola de fer inrudení (dopo la mort de Rubén M...Domingo, 3 de Maio de 2009 2:30
De: "Eduardo Montagner Anguiano" Exibir informações de contato Para: hotohonorio@yahoo.com.brNéola de fer inrudení


Dotré parole par Rubén Mazzocco Crivelli,
que tante olte al ó vist par strada
come part del nostro paeŝe
intant que scrivei
e que adés gue scrive
parque no l sará mai pi vist da ñisún.




¿Co qué parole parlar (si l é que gol parlar) sora la mort crudela del toŝat vero dóven?
¿Cóme indeñársele par molar fora la rabia, la stufezha, da le olte anca la paúra que se sent?
Mi a Rubén al coñosei vero solque come n toŝat del paeŝe que l pasea vía davanti de caŝa mea su inte la so segadora. Vero cusí. Coñose pi que sía a so pare, ó chacolá tante olte para lu sora la situazhión del paeŝe, e adés no olarisei ñanca imayinarme cóme que l se sentirá, insieme de la so fameya. Só que René al é an om preocupá par cuesta situazhión cua del paeŝe e que co l á podest yutar al á cosá.
Da la matina que i lo á squinzhá, a Rubén, senpre que sévite a scríver intorno le ore que l pasea davanti de caŝa mea, me pense co rabia de cuel que i gue á fat. No ui ñanca imayinar inte qué stati que i á da éser le áneme de la fameya de sto toŝat cua, no ui.
No son bon de véder, inte sta desgrazhia, dopo de la pérdita de la vita de n toŝat inozhente, na roña intra canp e zhitá que oñi olta la sará pi forte par nuatri.
Se pol dir que cuel que á pasá tanti del paeŝe al avión imayiná, senzha aver imayiná que l podea éser brut e dolorós cusí, né ñanca suíto come que l é stat. Le desgrazhie, anca co se le speta seguri, se le speta tardi, al pi tardi que se pode. E gol véder que le zhitá que i ol méterne su par sora ancora no le guen é no.
Inte l nostro paeŝe, éser an toŝat que l laora inte l canp al é ñist a éser cauŝa o perícol de mort. Pensarse que la desgrazhia la á pasá intra na segadora que la cor vero adaŝio e n autobús que l cor indiaolá al é an brut seño de cuel que ne speta.
Oñi tant perdón, a Chipilo, depí seguritá que na olta le é state le fondamente de la vita del paeŝe. ¿Quí, porco, pódelo pensar que l á da crepar intant que l nda co la segadora su l canp?
La situazhión, fa senpre, la é chara, scheta, ma anca delicata; tant cusí que, oñi olta fa senpre, quí sa si no l sarei pi meyo táŝer. Ma guen é entro par medo na mort: na mort inyusta, crudela, e co cuela mort lá mor anca nantro toc del nostro paeŝe.
Ma cazhón mo da na banda i do elementi parque i parle luri de sui:

Rubén Mazzocco Crivelli = Manuel García Moreno.
Segadora del pare-canp = autobús del parón-zhitá.
Intenzhión de Rubén: rivar e laorar = intenzhión de Manuel: pasar vía e pó scanpar