Ines Scarparolo

Ricordando me popà che 'l ga passà i mèjo ani de la so vita 'te le miniere de la Francia, del Belgio e de la Germania...

LÉTARA DA LA MINIERA:

Amore,
a xe cussì da tanto
che i brassi mii no pòe tegnerte streta.
El tenpo pì no passa qua in miniera,
par dó palanche ghe so’ stà costreto.
El sole daromài me orba i oci
e sototera xe deventà ‘l me mondo.
Ma tornarò da ti, staghe sicura.
La finirà presto, te ‘o prometo
sta vita massa dura.
Pensar che casa go sinque putèli
che cresse e che me speta...
Se ricòrdeli, pàrleli de mi, cara?
Xei deventà pì chièti, ciùciela ‘ncora
l’ultima toseta?
Ti dighe che ‘l popà li pensa note e dì,
no sta farghe savere ch’el laòra
co fa on s’ciavo,
contaghe de‘l ben che ghe vojo mi.
La sera, có so’ in leto e me vien da sangiotàre
me basta tirar fóra da’a scarsela
la foto tua, tesoro, e quela de i toseti
e ‘a vita ‘ncora la torna a éssar bela.
Scrìvame presto, còntame de quéo che fe’,
de i me vecioti, de la conpagnia...
Pardòname se te lasso sola,
sùgate le làgreme, pàra via la nostalgia.
Te ‘o se’ che ti te si’ la luse del me córe,
che mi sarò par senpre tuo,
amore.


Ines Scarparolo