Darcy Luzzatto EL NADAL

El Nadal

Se ghe ze un di che a mi no’l me piase,
ma che no’l me piase pròpio gnent,
l’è el di de Nadal!
L’è par mi un di come i altri, ma tase,
non vui mia intrigarme co la gent,
stao zito, par non parlar mal!

Quando credeva, go scrito anca mi,
poesie e stòrie sora el Gesù Bambin,
sora la festa del Nadal!
M’adesso i ze ani che non scrivo pi!
Parché? S’invesse de rose ghè dei spin,
e de busie un festival?

Mi vardo la gent, i par tuti contenti,
i se abrassa, i ride ... Quanta ipocrisia!
Ma l’è Nadal!
I pararia fin che i fusse tuti parenti,
ma in fondo in fondo tanti i volaria
ferirte, a tradimento, co’n pugnal!

Ah, cari amissi, ve domando scuse,
se son deventà agro e cossì amaro ...
Scuseme, del bon, l’è Nadal!
Valtri, deromai squasi tuti ntele buse,
ossi, strasse, scuro, gnessuna luse,
e dela vita eterna? Gnessun segnal!

Le Feste i le ga inventade i furbanti,
che i v’impromete eterna felissità!
E i aprofita el Nadal,
par ciuciar fin l’ùltimo scheo dei gnoranti
fàndoghe creder nte nantra vita al de là,
ndove no i patiria pi de gnessun mal!

Che pori gnochi che semo stadi, mia vera?
A ’verghe credesto a sti ‘pastori’! Pori cani,
pensando de liberarse de ogni mal,
se gavemo assadi strassinar nte sta tera,
a forsa de bale, de busie e d’altri ingani,
fra de tanti, anca quel del Nadal!
D.L.L.
La Pinta, Nadal del 1013.