EL T A L I A N

LIAN.

Honório Tonial

 

Me poro pupà lera maestro chel insegnea la Dotrina, leder e scriver e le quatro conte. No podea mancarghe la “Taboada”

“a e i o u” Scominsiea el primo  libro: Cartilha Maternal de João de Deus.

La ùlima lession la gavea  el tìtolo de Hino de Amor:

- “ Andava um dia em pequenino

Nos arredores de Nazaré

Em companhia de São José

O bom menino, o bom Jesus..”

Dopo vignea el secondo libro, el terso libro, la selete e el Manuscrito.

- Chi de noantri no se  recorda : - la bissaca, la tabela, la steca, la caneta con la pena e el tintiero...?!

La recreassion e el zugo de Campo ntea ora del merendin  i deventa momenti de eterno ricordo!.

-      Poche olte son ndato in “preson” parché corea come un lampo.

-      E i me compagni i vignea liberarme suito.

-      Zugheimo  el “fassoleto” la sentura, i quatro cantoni..!

-      Quanta nostalgia..!

Magari, in scola  se imparea come i papagai che i dise ma no i capisse mia.

Mi catea  strania la “Boa tarde” a la nostra: “Bona Sera.”

E le nostre prime cansion?

El Ciareto Su Quel Monte.. Pelegrin Che Vien de Roma... La Bela

Violeta... La Mariana.. El Massolin de Fiori, Sul Castel del Miramel, La Colombina La Va Par Aria..e  tante  altre.

La nostra comunità dea Linha Boa Vista, capela dea Madona del Caravaio, a Sananduva  la era composta solo de taliani: Par ordine geogràfica i era:

1- Bepo (José)Tartari, che i ghe ciamea “ Chinaia “ ( No sò parché)

2 – Gioan Tartari (Chinaia)

3 – Valente Fracasso

4 - Iano ( Valeriano) Fracasso

5 – Mathias Tonial ( El maestro)

6 – Cencio (Vicente )Tonial

7 – Toni (Antonio) Picinin (D’oro)

8 – Giorgio (Jorge) Picinin (D’oro)

9 – Selmo (Anselmo ) Perondi

10 – Gaitan(Caetano) Perondi

11 - Toni (Antônio) Perondi

12 – Arminio (Herminio) Perondi

13 –Gigio (Luiz) Dallaio

14 – Gigio (Luiz) Bruneto

15 –Gioan (João)  Bachi (copà ntea revolussion)

16 – Bepi ( José) Bachi

17 - Gioan (João) Giusti

18 – Piero ( Pedro) Tartari (Chinaia)

19 – Fiorindo (Florindo) Zenere (Nanei)

20 – Gioanin (Joãzinnho) Amadei

21 – Toni (Antônio) Amadei (Mandolin)

22 - Leodozio (Dozio)Bachi

Bisogna spiegar che gaveimo  le done con i so cognomi:

Boareto, Dagani, Ghindani, Bertoncelli ( Baràcola) Dalla Santa, Gregolin, Paloschi, e altre.

Come esempio, femo el nostro registro:

“Me poro nono paterno Antonio Tonial lera de Caneva, Sacille, Pordenone.

La nona  Paterna Elisabeta Moro la era de Vicenza , Veneto.

El me nono materno Francisco Dagani ( Fasolin) lera cremones, dea Lombardia

Me nona materna, Ernesta Bachi, la  era de Mantoa, Lombardia.

Alora sarò Furlan, Veneto, Cremonese e Mantoan. O Lombardo.”

Ricordemo i primi abitanti taliani del Rio Grande del Sul:

Sto preambolo el fa vegner la dimanda:

-      Qual la orìgine del Talian?

-      Dentro dea imigrassion gavemo la maioransa dei veneti.

-      Ma ntea diglosia dialètica nostra gavemo veri  nidi  de dialeti;

-      A)   Mantoani, feltrini, cremonesi, bassanesi, milanesi, trentini, furlani, bergamaschi, Bellunesi, napolitani,etc... Tuti confinai ntea selva con tute le agrure del isolameno e la mancansa de ogni recurso.

Saria na vera babele rissercar la orìgine etimològica de tuti i dialeti, diversi de questi belche sparidi.

Alora noantri gavemo imucià la maniera de farse capir dele nostre persone dea comunità che resulta una vera “menestra”, sensa o con poche predominanse na vera filantropia che la ga ricevesto el nome de TALIAN.

Come e ndove lè sta fato sto batésimo?

El movimento el ga tante radise:

A Serafina Corréa i ga fato el primo registro ntea Prefeitura.

Diversi scritori i ga publicà i so libri de Stòrie e Fròtole, come Nanetto Pipetta de Achiles Bernardi, i libri de Darcy Loss Luzzatto, la Editora EST dei Frati Capucini, spèssie soto el comando de Rovilio Costa, tanti scritori de Caxias do Sul, Santa Maria, Erechim, Flores da Cunha , Bento Gonçalves, Garibaldi e diversi  altri munissipi del Brasil.

Movimenti par meso dele programassion radiofóniche e publicassion ntei giornai i gà fortificà el movimento.

Ma la Pia Batèsimal del Talian la ga bio el so momento fatal al tèrmino de diverse reunion de un grupo de rissercadori, in reunion a Serafina Correa ndove el architeto Julio Posenato el ga apresentà la susgestion ben fundamentada, del vocàbolo TALIAN, con consenso de tuti i participanti.

Luzzatto, Costa, Massolini, Arroque, Maneco, Beltran, Tonial, Alberti,  Lago , Piloto e Gonçalves i ga concordá par unanimità.

Ghe Nassesto la idéa de elaborar na “Cartilia’ del Talian”. Honório Tonial el ga fato la sàgoma del libro: ADESSO IMPAREMO. Luzzatto el ga fato la editorassion e la impression. El se ga  tornà  paron dei diriti editoriai.

Me toca far un registro tuto spessial al professor Giovanni Meo Zilio chel ga dato el so valioso contributo al risgato del idioma dei nostri imigranti.

Con na verba del Governo Italiano e con la so presensa inaugural gavemo fato un Curso de Talian ntea URI de Erechim. Silvino Santin, Helena Confortin, Vitor Nardeli e Honório Tonial i gà ministrà la programassion convensionada.

Anca, sentimo la necessità de mensionar i Incontri dei Corai e le reunion dele fameie.

Diverse organisassion come; El Gilè,  el Grupo Avanti, I Miseri Coloni, la Fabricheta de Rider, Sul Paion e diverse altre entità  de cantoria e dramatisassion  le ga el so mèrito.

Ma , dimandemo:

- Cosa zeli  drio far  par salvar el Talian?

Dispiase segnalar che serte instituission che le  pararia Taliane,  le se  dise “venete” le insegna el Italiano Ofissial in detrimento del "parlar dei contadini“ come lori i lo giudica.

-      Vien   in mente el  lupo con la lana, o la volpe co le ciave del ponaro.

Volemo dir chel nostro Talian el deve èsser na porta par studiar anca la lìngua de Dante.

El nostro paese el dopera el Portoghese, o sia la lìngua del Portugal.

Serte dotorande dea università le ga defeso la tese del Talian par poder laurearse, seanca, magari, le ghe dà poco valor al Talian. Le me fà ricordar el lebo (ghebo), un rissipiente par darghe el bevaron o le sémole a le bestie domèstiche

Dopo de ver impienio la pansa se pol reversar sto lebo a gambe in su.  ...

Grassia al Signor, adesso gavemo la Radio Talian  Brasil e la Revista Talian Brasil che mi volari che la deventasse anca la Revista Mondo Talian parche mantegno corespondensa con diverse persone taliane de paese del mondo, doparando sto caro idioma:  Italia, Germania, Francia, Mexico, Argentina, Stati Uniti.

Gavemo 404  contati, con predominio ntel Brasil.

No saria mia giustissia se no segnalasse na referensa tuta spessial al Jovino Castel e el so congiunto chel ga musicà la me poesia ASVIRMONTAVE – Assossiassion Mondial del Talian Veneto che la suora de Roma Giovanna Zanotto la ga ilustrada.

Nantra persona che la se mèrita el ricordo la è la Dotoressa Giorgia Miazzo na giornalista e maestra italiana che la se impegna par el Talian. Un onor al mèrito.. La felicità de riceverla a casa mia la se merìta el registro...

Par diversi ani, go fato scola de Talian a :

Erechim, 2 ani: Gaurama, 1 ano letivo: Jacutinga, 1 ano letivo: Ibirubà,  Curso intensivo de una stimana; Palma Sola, Santa Catarina,       Curso Intensio de una stimana..

Come autodidata go scrito: Imparando Talian, Abecedario del Talian. Cartilia Virtual, Vademecum del Talian, Apendisse, Verbi Taliani e altre publicassion che se pol catarle acessando le parole-ciave HONORIO  TONIAL WIKIPEDIA.

-      Meritaria crèdito diverse reunion, programassion de radio col cognome TALIAN quando se dopara el Portoghese e el Italiano Ofissial par“studiar” el nostro parlar?

-      Con la informassion sgoelta e moderna podaréssimo far na cadena de amicissia e cultura doparando el e-mail par far i  bei anei.

-       Ogni volontario Talian nol guasta gnete par dirghe al so amigo chel  ghe mande la  sugestion a altre tre persone.

-      In poco pi  de tre di varéssimo semenà el Talian par squasi tuto  el mondo.

-      Queste considerassion le ga el  vero scopo de darghe valità   a la espression:

 MI SON TALIAN, GRASSIA A DIO!