DOMÉNEGA

 

    Piovea  pimpianeto  doménega de matina e zera anca fredo, go leva sú bonora , fato l`é  preguiere e dopo in cosina con el simaron e àqua calda go ciamà me dona, parche nó me piase el simaron sensa compania e anca par me el simaron  l`é  depi  che un  costume, l`é anca amicissia e fraternità,  Dopo gavemo liga el  ràdio ntea programassion  taliana, parche noantri portemo avanti el  Talian, nostra lengoa materna, che l`é  patrimònio  che gavemo eredità dei nostri bisnoni, e che bela cancion e parole in Talian che gavemo scoltà.  Bisogna che reingrassiemo a tuti quanti.Dopo parlando com me sposa, me gà vignesto in mente che gràssie a Dio el Brasil gà cambia, parche ani vanti, nò se podea parlar Talian. Bruti tempi ze stato í ani quaranta con La goera mondial. El goerno brasilian gávea paúra che ì tedeschi portesse la goera  ntel Brasil e la Itália zera insieme con í tedeschi, cosi nò se podea parlar Talian, í catea che tuti descendenti í fussi “fassisti” (quinta coluna). Zio Ventura se anca picoleto in quei ani, ancora se ricorda che tuti gávea paúra de parlar Talian parche se andea in gàbia.El goerno brasilian zera cativo e anca baúco, parche nó volea che se parlese Talian, tutavia nó gà dato oportunità dei dessedenti imparar el portughese: Sensa Scola e sensa maestri, andar andove imparar a lèder, scriver e parlar?  Nostra gente gà tribula e pasa dificultà e tanti andato in preson sensa delito. Í  matusséi del goerno í catea che í póveri coloni í fussi spioni che mandea segni aí tedeschi e anca í brasiliani quei piú cative, í gávea ràbia dei pòveri coloni, ghe piasea dinunsiar e anca darghe bastonade.Nostro pupà Tóni Lizot, gà toca tante volte difénderse dei rabiosi e lú zera compagno dei altri coloni;  un cristian de pace e laoro, in so vardar gávea amabilità, ma anca la tempesta e dopo cativo l´éra brute robe, el gávea tanta forsa nte brassi, l`era  costuma ribaltar mato con la manera e taiar piante con la sega de man. Cossi anca lu gà andato in preson, nó par parlar Talian, ma par dargue bastonade ai rabiosi.Finia la goera in 1945, dopo che tanti dea nostra gente gà servitù nte trupa brasiliana (Força Expedicionária Brasileira ) e infronta la goera con coraio e sensa spaventarse dele canonade tedesche e retornati bravi e triunfanti, de la in vanti, la tribulassion dei coloni gà ferma, tutavia fin í ani 70 e 80,  ancora í gávea scarsa considerassion con í coloni, í  ghe schiamea de “grosso” ghe ridea drio, magari quei che fea cossi, zera quele persone gnorante, Lazaroni,  stupidei e invidiossi.  Alora nostri genitore se gà nicorti de far studiar í fioi e Lori con laoro e fede in Dio í gà deventà dotori e dopo retornati casa, í gà fato la colônia rica, bela e esémpio par tuti Doménega de matina...,  la piova pimpianeto su par Le scàndole e dopo fini l´àqua del simaron, Le campane dela cesa, scomissia a sonar;  me dona gá ciapà la umbrela e me go ciapà la so man e andemo in cesa ringrásiar al Signor par la pace e fraternità  e anca par che el Talian, nostra lengoa materna l`é reconhoçuta  e la gràssia de portar avanti  la maniera de i nostri bisnoni, la so stória che ze tanto bela.

Ademar lizot.