I IGNOTI

I ignoti.

Leder un libro sempre le una meraveia, mèio ncora se in tee so righe se scopre còse interessante, che ne fa pensar sora quelo che ze scrito, par aiutarne a crescere e anca sviluparsi, sensa perder le regole che ne giusta in tea vita, prinsipalmente quando ste regole le vien coi fondamenti in te insegnamenti dei antenati.
In te una foia de carta, qualcuno pol scriver. Se la carta ze nova, senza gnente scrito, se pol meter su notissìe, ciacole, fròtole, preghiere de tute le magniere e qualità. Ma scrivere co la testa a giusto posto, col cuor e co l’ànima, e par sora esser bon de trasmetere a quei che lede i sentimenti che vive nel’ànima de quel che scrive, ze un dono che ciare e poche persone lo ga e lo sa far.
Quando gò scominsià a ldeer el libro “I IGNOTI”, che ze on bel romanso scrito in TALIAN, spetava de trovar schersi e busie, ma me gò nicorto a tempo del me sbaglio. Schersi ghenè, ma l’autore, co la so imaginassion, el ga bio la virtù de portar el letore al fassinante mondo dei ricordi, che tuti noantri lo gavemo sconto in te un canton dea memòria, e che d’un colpo, al medesimo momento, el ritorna con dolcessa e ne porta al tempo che non ritorna più, a la nostalgia del tempo dela nostra gioventù. El libro fa ricordar el crudo momento che i nostri migranti i ga bio bisogno de dassar i parenti e la pàtria che no zera bona de mantegnerli vivi, el viaio fin el Brasile, la natura che sianca inòspita e pericolosa, zera pura e piena de vita: bèstie che ncoi le vedemo solo in tee stampe dei libri, le grosse piante a afontar la manara e anca i forti brassi de quei òmeni e done disposti a laorar la tera: le prime stradele pi someiante a trodi; la prima caseta coerta de paia o scandole; la fontana de àqua pura a originare el rieto che ndea corer zo par la riva; le pavele e osèi a volar ten cielo imenso e azuro. Ne ricorda anca el desidèrio dele persone, i so sogni, le so virtù, le fiachesse ”umane e sossiale”, le malatie del corpo e del’ànima, el rispeto a le règole de convivensia in comunità, ben come le aspirassion de vita dei fioi e fiole dele gerassion seguente.
L’idèa sentrale de questo romanso ze la gran quantità de bambini e bambine, che par colpa dea strema povertà, fea con che i genitori li donessa o vendessa, a fameie in condision de mantegnerli. Sti popini i diventea òrfani biològichi, mia tanto diferente ai giorni de ncoi, de tanti neonati, spariti par coesto gran mondo da Dio. La condission de òrfani, no ze dificoltà par trionfare tea vita. Da òrfani pol vegner fora dotori, avocati, maestri, preti, moneghe, mame e pupà e tanti altre profission, ma el pi importante ze esser gente onorata e saver amare e rispetare quei che, tra el gesto de indotare i òrfani, i ghe da la condision de vegner a esser persone de rispeto.
A quei che ghe piase leder un belissimo libro e a tuti quanti vol imparar a leder nel nostro TALIAN, racomando sto libro. I IGNOTI ze vegnesto fora dea testa den vecieto, oramai de cavèi bianchi, ma na vera autorità e co la sapiènsia de un vero scritore. Parlo del barba Honório Tonial, che’l sa come nissun altro, mantegner come pochi, la maniera de parlar, de scrìvere e pensar in talian, una lingua piena de espression e sentimenti che toca diretamente el cuore dea gente, come tochea el cuore e i sentimenti dei nostri antenati taliani. Chi vol saver depi sora sto libro ze sol farghene una telefonata al numero: 0.xx.54.321.3523. E bona letura.