LA GRATA - Luiz Radaelli

La Grata

Par chi ga bio el infortunio de gaver qualche tipo de spissa el sá che ze na sensassion mia bona.
Co la voia de pararla via bisogna gratarse e pi che se grata, pi spissa vien.
Gratarse ze na situassion, ma gaver “la grata” la ze nantra cosa e altro che rogna.
La grata ze na malatia che vien quando manca risguardo co`l corpo, sopratuto co manca el bagno.
Ncoi ciare olte se vede qualchun co la grata ma sti ani zera scoasi na malatia.
A quel tempo se gavea el costume de bagnarse na olta a la stimana, scoasi sempre al sabo e chi gavea la grata l`patia che mai.
Come no se gavea i ricorsi de la medissina d`ancoi, par urtarla via fèven na mescolansa de bagna e solfro par ondar l`area del corpo ndoe spissighea. La ndea via ma el corpo el restea co na spussa che mai.
Fidarse de ndar smorosar col udor de solfro zera domandar par ciapar el caròn.
El fradel del zio Clemente el ga proà ndar a morose col gavea el profumo de bagna e solfro, e de tanto che`l spussea, se no bastea la femena dirghe che`l ciapessa la strada, fastidiosi, co arquante morsegade i cagni ghe ga sbregà le braghe de brin diamantino próprio tel tafanàrio.
Dopo questo, de paura de no maridarse, tuti mesi el bevea on sciantin de creolina, o del balsamo tedesco.
Ma el ze deventà scàpolon parche nissuna dona volea snasar sti profumi poco diletanti.
Colaboratore: Luiz A. Radaelli – Lajeado – RS